IPIRATES NOMGADLI OMUSHA?
KUNGENZEKA kubonakale umgadli omusha kwi-Orlando Pirates njengoba imibiko eqhamuke izolo iveze ukuthi lezi zindaba zipotshozwe usihlalo weqembu u-Irvin Khoza. Kuthiwa uJustin Shonga waseZambia kungenzeka abe eseqenjini namuhla. EZimnyama ziyagqoza kumafolosi ngemuva kokuhamba kukaTendai Ndoro, osedlala eSaudi Arabia, okwenze lathembela kakhulu kuThamsanqa Gabuza.
Nokho iqhawe elinguPotshoza selifundile ukuthi kwesinye isikhathi likholwe ngokubona uma kuziwa kubadlali abasuke bemenyezelwe ngamaqembu.
IBucs le izithola intula nje, ngesikhathi kuvulwe iwindi imemezele umgadli waseNigeria, uChristian Obiozor kodwa gwiqiqi, umdlali akasabonwa sekusho osibhincamakhasana ukuthi ubuyele emuva ngoba sengathi uKhoza washeshe wamveza kube kukhona okwakungakaqedwa.
UPotshoza ethinta imenenja kaShonga, uMichael Ngobeni, itshele leli qhawe ukuthi ayiyazi indaba yePirates.
“Nami ngizwa kushiwo kanjalo. Mina angiyazi indaba yePirates. Okwamanje ngicela ukuma lapho ngoba ngibona kusazosuka umsindo ngendaba kaShonga,” kusho uNgobeni.
UShonga ogaqelwe yiPirates uyisosha. Ugile izimanga kwiCosafa Cup iZambia iguqiswa yiZimbabwe emdlalweni wamanqamu. Emidlalweni emithathu uqhulule amagoli amathathu okwenze waqeda umqhudelwano nabanye abagadli abashaye amagoli amaningi. UShonga ugijima kwiNkwazi FC edlala kwiligi enkulu yaseZambia. IMamelodi Sundowns nayo ibimfuna uthuli uShonga