Amabhokisa afuna ungqongqoshe
AMABHOKISA aKwaZulu-Natal afuna izimpendulo kuNgqongqoshe weZemidlalo kazwelonke uThulas Nxesi ngendlala yezimpi esifundazweni.
Isimo sabashayisibhakela besigaba esikhokhelayo eKZN sifikisela ngosizi ezinkulungwaneni zabathandi bezamankomane. Ngesonto eledlule kubulawe obengumshayisibhakela, uSimphiwe “Ntelezi” Mthethwa, oshaywe wumphakathi kwa-Q eMlaza esolwa ngokweba amateki.
UMthethwa, obekubhekwe lukhulu kuyena eKZN ngenxa yekhono lakhe, ugcine engene ezidakamizweni, ekhala ngokungazitholi izimpi.
Ubesephila ngokubhema i-wunga. UNtelezi olwe izimpi ezingu-13 (6-6-1) ugcine ukungena eringini ngo-2012 ehlula uPromise Cabe ngomcacamezelo womlalisa phansi empini yebhande le-KZN bantamweight eyayiseThekwini Boxing Gym.
Le mpi ilandelwe yizinkulumo kusolwa unompempe u-Eric Khoza ngokwenzelela. Ngo-2013 uMthethwa utshele Isolezwe ukuthi isifiso sakhe wukuwinela iKZN ibhande le-World Boxing Association (WBC) kodwa okumphatha kabi wukuthi akazitholi izimpi. UScelo Mzobe ongomunye wabashayisibhakela abanamava eKZN, ushaqekile ngokudlula emhlabeni kukaMthethwa. “Yimiphumela yokungazitholi izimpi yonke lena. UNtelezi ubesithanda isibhakela. Uzamile ukubuya kwangalunga. Kubuhlungu ukuthi ugcine ehambe emhlabeni ngale ndlela,” kusho uMzobe. “Kufanele ungqongqoshe kazwelonke asicacisele ukuthi yini okufanele siyenze ngoba kwezinye izifundazwe imali yokuhlela izimpi iyaphuma. Ngeke sisole uMnyango weZemidlalo ngoba asazi ukuthi ithini imibandela esebenza ngayo. Uma kuwukuthi imali ayikho, ungqongqoshe akeze azoyifaka. Siyalimala.” Omunye ongathandanga ukudalulwa uthe: “UNtelezi ugcine engene ezidakamizweni ngenxa yokungazitholi izimpi. Konke lokhu kwenzeka ngoba asinakiwe eKZN.” Isolezwe lihabule ukuthi abashayisibhakela eKZN bahlongoza ukhukhulelangoqo wemashi ngokuntuleka kwezimpi.