Uphenyo ngehholo laseMzimkhulu
UMVIKELI woMphakathi, u-Adv Busisiwe Mkhwebane, useqale uphenyo ngehholo lomphakathi iMzimkhulu Memorial Hall okusolakala ukuthi kwadliwa izigidi ngalo.
UMkhwebane kuthiwa uzophenya ngehholo nangezinye izikhalo ezibekwe abantu baseMzimkhulu.
Kubikwa ukuthi sekudonse iminyaka emihlanu ukulungiswa kwehholo kanti umkhandlu usuchithe imali ebalelwa ku-R16 million. Kunenye imali esazokhishwa ukuze libe sesimeni esamukelekile.
Ikhansela le-ANC, uMnuz Sindiso Magaqa, elifihlwe ngenyanga edlule ngemuva kokudutshulwa ngoJulayi lalicele ukuthi kuqalwe uphenyo ngehholo. Kunemibiko yokuthi kungenzeka ukuthi ukubulawa kwalo kuhlobene nezicelo zalo zokuthi kuphenywe ngomkhonyovu obuqhubeka kule ndawo.
Ngesikhathi edutshula, kwalimala kanzima namanye amakhansela e-ANC kodwa agcina ephumile esibhedlela. Njengamanje iMemorial Hall isilungiswa yinkampani yesibili ngemuva kokushiya kweLoyiso Consultants Civils, umasipala othe yashiya ngoba ingakwazi ukumelana nomsebenzi.
ILoyiso Consultants yayisikhokhelwe u-R10 million. Inkampani yesibili eqashwe ngonyaka odlule isikhokhelwe u-R6 million kwisabelo mali ka-R14 million ebekwe eceleni ukuthi kulungiswe ihholo.
Ngesikhathi iphephandaba elinguzakwabo weSolezwe, iThe Mercury, livakashele le ndawo ngeledlule kwakungekho muntu osebenzayo, kukhona abantu ababili nje kuphela, oyedwa wabo kungumqaphi wezokuphepha.
Okhulumela uMvikeli woMphakathi, uCleopatra Mosana, ukuqinisekisile ukuthi ngoSepthemba 21 kuqalwe uphenyo ngalolu daba.
Imizamo yokuxhumana neLoyiso Consultants Civils ayiphumelelanga ngoba inombolo yenkampani ibingasebenzi kodwa kuvele ukuthi izinze eWestern Cape. Inkampani yesibili ethintiwe ucingo ayilubambanga.
Okhulumela umasipala waseMzimkhulu, uMnuz Willie Mgcina, uthe umkhandlu usuqalile ukukhuluma nehhovisi loMvikeli woMphakathi.
“Akulona nje ihholo kuphela okuphenywa ngalo, kunezinye izinsolo ezibikwe umphakathi okuphenywa ngazo,” usho kanje.
Obesondelene noMagaqa, uMnuz Thabiso Zulu, naye uthe selimthintile ihhovisi loMvikeli woMphakathi.
“Siyalwamukela uphenyo olwenziwa nguMvikeli woMphakathi futhi siyazi ukuthi akuyena yedwa ophenyayo,” kusho uZulu.