‘Angibasayinisi ngedwa abadlali’
IZIVIKELE imenenja yeKaizer Chiefs, uBobby Motaung, ngokushaya udaka kwaMakhosi kule sizini ka-2016/17.
IChiefs iqunjwe phansi yiBaroka FC ngo 2-1 eMoses Mabhida Stadium, eThekwini, ngempelasonto. Leli qembu lishaywa nje nakwiMTN 8 liphume ekuseni likhishwa yiSuperSport United kumaquarterfinal alo mqhudelwano. Amakhosi sekuphele amasizini amabili nohhafu engawini lutho. Abalandeli bakhala ngabadlali abasayinwa nguBobby.
“Le nto iyaxaka. Uma iqembu lenza kahle kuthiwa umqeqeshi usayine abadlali abaseqophelweni eliphezulu kodwa uma liphikwa yimiphumela kugxekwa uBobby. Namanje ngisamile ekutheni abadlali esibasayinile abasezingeni eliphezulu. Abanye babo abakadlali ngisho ukudlala njengoba sekuthiwa abekho ezingeni lokudlalela iKaizer Chiefs.
“Mina ngithi asilinde kuphele isizini bese siyabona ukuthi abekho ezingeni leChiefs ngempela yini. UBobby akayena umqeqeshi kodwa uyimenenja yeqembu. Izinqumo akazithathi yedwa, uBobby akayena umnikazi weqembu. Angaliphatha kanjani iqembu elikhulu kangaka yedwa? KwiChiefs kunethimba lezikhulu, ibhodi, ithimba labaqeqeshi nekomidi elihlala phansi lithathe izinqumo uma kuzothengwa abadlali. Angazi sengizoyichaza kanjani le nto kodwa nani zintatheli ninesandla ngendlela enibika ngayo. Angazi nibika kanjani,” kusho uMotaung.
Ekuqaleni kwesizini iChiefs isayine uPhilani Zulu, Teenage Hadebe, Bhongolwethu Jayiya noDumisani Zuma. Ngesizini edlule iChiefs ilande uLewis Macha, Michelle Katsvairo, Edmore Chirambadare no-Ennocent Mkhabela. Abanye abadlali abangasekho kwiChiefs eke yabasayinisa nguBongani Ndulula, Siphelele Mthembu no-Edward Manqele.
IChiefs ihlezi endaweni yesithupha ngamaphuzu ayisishiyagalolunye ngemuva kwemidlalo eyisikhombisa.
Leli qembu selinqobe imidlalo emibili, ladlala ngokulingana kwemithathu lase lahlulwa kwemibili. Lihlukaniswe ngamaphuzu ayisithupha neBaroka FC eqhwakele ngamaphuzu angu-15. “Asikho isidingo sokuxhamazela, iChiefs ayikho esimeni esisabekayo. Kunamaqembu asesimeni esisabeka ngaphezu kwesimo seChiefs. Isizini isaqala, ngeke sithathe izinqumo ngokudinwa. Kumele izinqumo esizithathayo kube yizinqumo ezenza umqondo. Umqeqeshi usenenkontileka neqembu futhi akayi ndawo.
“Asikwazi ukuthi sishaywe umdlalo owodwa ngemuva kwalokho bese sithi umqeqeshi akakhululwe. IBaroka ithole amathuba amabili yawasebenzisa. Thina sithole inqwaba kodwa sahluleka wukuyisebenzisa,” kusho uMotaung.
UBobby usihlabe wasihlikiza isenzo sabalandeli sokucekela phansi impahla eMoses Mabhida Stadium.
“Okwenziwe ngabalandeli akuhambisani nemigomo yeqembu. Asihambisani nesenzo sabalandeli. Siyaqonda ukuthi abeneme ngomphumela weqembu kodwa lokho akusho ukuthi kumele baziphathe budlabha. Uma befuna ukuzwakalisa ilaka labo iminyango yeqembu ivuliwe. Ukumosha impahla enkundleni ngeke kulungise inkinga,” kusho uMotaung.
Abalandeli abagcinanga ngokujikijela enkundleni kodwa bebethuka naye uBobby bekhala ngokuthi usayina abadlali abangathi shu.
Bagcine sebelwa namaphoyisa ngemuva komdlalo baze bacelwa ukuthi baphume enkundleni ingakapheli imizuzu emibili. Kulindeleke ukuthi iPremier Soccer League (PSL) iyithathele izinyathelo iChiefs ngenxa yokuziphatha kwabalandeli bayo.
Emdlalweni olandelayo we-Absa Premiership iChiefs izobhekana neMamelodi Sundowns ngo-Okthoba 17 eLoftus Stadium, ePitoli.