Bafundela emnyango abafundi abadilikelwa yikilasi
BAFUNDELE ngaphansi kwesihlahla abafundi bakwaGrade 9, baseNkangala Secondary, eNgodini, eWeenen, izolo emuva kokudilika kwekilasi ngenyanga edlule ngenxa yemvula enamandla.
Ngemuva kokuqala kwemvula ebina kakhulu izolo emini kudingeke ukuthi basheshe bagodukiswe.
USihlalo wesigungu esilawula isikole, uMnuz Shayina Sithole, uthe abafundi abawu-40 bafundele kuvulwa izikole.
Uthe ikilasi ladilika ngoSepthemba 15, base bewubikela umnyango kodwa okwamanje bekungakenzeki lutho.
“Abekho abafika bezobheka isimo. Okwamanje simbambe eThandanani Primary. Isikole sethu sinamakilasi amabili, uGrade 8, no-9 kuphela. Kwalona elakwaGrade 8, bangu-47 abafundi abafundela kulona kanti kwalona alikho esimeni. Abafundi bayaminyana, bacuphisane emadeskini ngoba asinaso isikole,” kusho uSithole.
Unxuse umnyango ukuthi ungenelele usize ngoba abafundi bezogodukiswa njalo uma lina ngoba bafundela emnyango.
“Ayikho enye indawo esizofundela kuyo ngaphandle kwasemnyango. Uma kwenzeka lina nje kumele bagoduke ngoba akukho lapho bezokhosela khona,” kuqhuba uSithole.
Uthe njengoba sekubalwa izinsuku ngaphambi kokuthi kubhalwe izivivinyo akazi ukuthi bafundi abadilikelwe yikilasi bazobhalelaphi.
“Siyathandaza nje ukuthi lingani ukuze bakwazi ukubhalela emnyango. Isimo sinzima siyafisa okungenani silethelwe amagumbi angomahambanendlwana ukuze sikhosele kuwona sisalinde ukulungiselwa,” kusho uSithole.
UMnuz Kwazi Mthethwa, okhulumela uNgqongqoshe wezemfundo, uMnuz Mthandeni Dlunwgane, uthe zingaphezu kuka-300 izikole ezoniwe yimvula esifundazweni.
Bayangenelela basize ngamagumbi angomahambanendlwana uma sekuphazamiseka ukufunda.
“Sizohambisa amagumbi angomahamba nendlwana kulesi sikole ngoba uthola ukuthi ezinye noma zonakele kodwa kusuke kusasebenzeka kuzona. ENkangala Secondary akusasebenzeki yingakho sizothumela amagumbi angomahamba nendlwana,” kusho uMthethwa.
“Kunohlelo olulandelwayo uma kuzokwakhiwa isikole noma sizolungiswa. Uthola ukuthi isikole sisohlwini lokwakhiwa kodwa kuhamba kancane ngoba kusuke kusalandelwa lolu hlelo,” kusho uMthethwa.