Zibathwalisa nzima abantu emsebenzini izifo ezithinta ingqondo
UCWANINGO olusanda kwenziwa lukhombisa ukuthi abantu abanezifo ezithikameza umqondo bathwala kanzima emsebenzini ngenxa yazo.
Umbiko weSouth African Depression and Anxiety Group (SADAG) uveza ukuthi balinganiselwa ku-61% abantu abanezifo ezithikameza umqondo asebephumele obala ngokugula kwabo kubaphathi babo emsebenzini. Abangu-69% kulaba bathi bazithole bephathwa ngendlela engeyinhle noma bengatholi zimpendulo kubaphathi babo uma bedalula ukuthi banezifo ezithikameza umqondo.
Omunye wababe yingxenye yocwaningo uthe uzizwe engakhululekile ngesikhathi etshela abaphathi bakhe ngesifo esimphethe.
U-Okthoba yinyanga yokuqwashisa ngezifo ezithikameza umqondo. Namuhla umhlaba wonke ugubha usuku lokukhuthaza ukunakekelwa kwesimo somqondo, World Mental Health Day. Kulo nyaka i-SADAG ikhethe ukugxila ekuqwashiseni ngokubaluleka kokunakekelwa kwesimo somqondo wabantu emsebenzini.
Ucwaningo lwayo olwethulwe eminyakeni emibili edlule luveze ukuthi umsebenzi oyedwa kwabane uhaqwe ukhwantalala.
Kulo nyaka iSADAG iqoke ukubheka ukuthi bacindezeka kanjani abasebenzi emsebenzini ngenxa yokuba nesifo esithikameza umqondo.
Udokotela wengqondo, uDkt Frans Korb, uthe izifo ezithikameza umqondo, okubalwa kuzo ukhwantalala, zinomthelela omkhulu ekuphazamiseni ukusebenza ngendlela kwabasebenzi.
Uthe ukhwantalala luphazamisa ukusebenza ngendlela komqondo, lwenze kubenzima ukuthi umuntu athathe izinqumo, abhekane nezidingo zomsebenzi nokuxazulula izinkinga. “Uma umsebenzi onokhwantalala esemsebenzini usethubeni elikhulu lokungenzi umsebenzi ngendlela efanele futhi uyafana nomuntu osuke elovile emsebenzini.”
Ucwaningo okukhulunywe kulo nabantu abawu499 obekukhona kubona abesifazane abawu-79% namadoda awu-21% lukhombisa ukuthi u-44% wabantu bebengenankinga ngokuxoxa nabaphathi babo ngezifo ezithikameza umqondo ezibaphethe.
Umqondisi wezinhlelo eSADAG, uNksz Cassey Chambers, uthe kubalulekile ukuthi kuphenywe ngendlela okungamelwa ngayo ukhwantalala emsebenzini.Ukuthola ngezifo ezithikameza umqondo ungavakashela ku www.sadag.org noma ufonele ku: 0800 70 80 90.