URobbie Malinga uchitha eyokugula
INKAKHA yomdidiyeli ebuye ibe ngumculi, uRobbie Malinga, iphinde yalaliswa esibhedlela ngenxa yokugula.
URobbie ube nengxoxo ekhethekile naleli phephandaba ngo-Agasti lapho aphumela khona obala ngokugula kwakhe okwaze kwamlalisa esibhedlela kwamehlisa nasemzimbeni.
“Igazi lami belingaphampeki kahle emzimbeni. Yingakho abantu bengibone ngehla emzimbeni. Ngisebenze kanzima ngonyaka odlule kodwa manje yonke into ihamba kahle,” kusho uRobbie.
Omunye wabaphathi be-Universal Music, uRobbie asebenza kuyo, uDharam Sewraj, ukuqinisekisile ukuthi uRobbie uke wangena esibhedlela ngeledlule.
“Ubesesibhedlela izinsuku ezimbalwa. Usengumqemane futhi uyasebenza. Ubesehhovisi nje izolo (esho kuthangi),” kusho uDharam.
Ethintwa uRobbie uyichithile eyokugula kwakhe.
“Abangiyeke laba abangifuna phansi. Ngiyaphila, uyangizwa nawe,” kusho uRobbie.
Uthe abantu abagxile ezintweni ezinhle azenzayo.
“Bhala lapho ukuthi iyaphuma ngoLwesihlanu i-albhamu kaKhoisan Maxy. Eyami izophuma maphakathi nenyanga ezayo,” kusho uRobbie.
UKhoisan Maxy ngumculi wakhe omusha wesifazane onengoma ezwakala emsakazweni ethi Why Uvuma?
Khonamanjalo, inkakha ye-jazz uHugh Masekela uthe iyalubonga uthando nemiyalezo yokwesekwa eyitholayo njengoba igula. Ubhale lokhu ekhasini lakhe leTwitter.
NgoMgqibelo ekuseni uHugh ukhiphe isitatimende lapho ebhoboke khona ngokugula kwakhe njengobe ethe uphethwe wumdlavuza wamankwahla osusabalele nakwezinye izindawo emzimbeni.
Kusukela ephumele obala imiyalezo yokumfisela ukululama okusheshayo evela kuzo zonke izinkalo ingena ilakanyana.
Kanti umsakazi weRadio 702, uXolani Gwala okusanda kuzwakala ukuthi uphethwe wumdlavuza kapopopo, kunemibiko yokuthi uzoqala ukwelashelwa lesi sifo maduzane, naye uthembise ukuthi uzolwa naso.