Idlule nemiphefumulo imvula enamandla KwaZulu-Natal
ISHIYE kukhalwa imvula ebihambisana nomoya onamandla KwaZulu-Natal izolo. Kushone ilanga sekushone abayisithupha. UMnuz Lennox Mabaso wezokuxhumana eMnyangweni wezokuBusa ngokuBambisana neziNdaba zoMdabu KwaZulu-Natal, uthe kushone intombazanyana eneminyaka eyisishiyagalombili eshaywe wumbani eMbewunye, eNquthu, ngoMsombuluko ebusuku.
Kuphinde kwashona indoda (46) emuke izama ukuwela umfula obugcwele KwaMngxangala, eNquthu, izolo.
UMnuz Nick Dollman wakwaNetcare 911 uthe izolo, kushone indoda (40) eyiphoyisa eselathatha umhlalaphansi emuva kokuthi imoto ebihamba ngayo iwelwe yikhonteyna.
Le ndoda ikhishwe ngabezimo eziphuthumayo besebenzisa izindlawu ngoba imoto ebihamba ngayo iphenduke isicaba kwathi umgibeli ebihamba naye oyiphoyisa waphuthunyiswa esibhedlela.
Kuphinde kwashona umsebenzi woPhiko lwezamaPaki nokuNgcebeleka kuMasipala weTheku owelwe wudonga abekhosele kulo ebhishi.
Esibhedlela iPrince Mshiyeni Memorial kushone iziguli ezimbili kwalimala ezimbili ezidilikelwe wudonga.
Isazi sesimo sezulu uMnuz Aslam Sardiwalla we-SA Weather Services sitshele Isolezwe ukuthi lokhu okwenzeka KwaZulu-Natal yisimo sezulu esijwayelekile njengoba kusuke umsinga obandayo weza ngasemhlabeni usuka olwandle kwase kuna imvula ehambisana nokuduma kwezulu.
UMnuz Sam Mkhwanazi ophethe ezokuxhumana eMnyangweni wezeMpilo KwaZulu-Natal, uthe izibhedlela zabo ezikhahlanyezwe yimvula, okuyiKing Edward, King Dinuzulu, Addington, Wentworth, RK Khan, Prince Mshiyeni Memorial nezinye.
Kuphazamiseke ukusebenza emabhizinisini amaningi aseThekwini ngenxa yemvula yayizolo okubalwa nakwaToyota South Africa, eProspecton.
UMengameli wakwaToyota South Africa Motors, uMnuz Andrew Kirby, uthe kulimale izakhiwo zabo, izimoto nemishini eyakha izimoto zakwaToyota ngenxa yemvula.
UNkk Shulami Qalinge, oyisikhulu esiphezulu kwaTransnet National Ports Autority (TNPA), uthe bamise imikhumbi eza emachwebeni abo aseThekwini naseRichards Bay ngenxa yemvula ebihambisana nomoya onamandla.
Uveze ukuthi eminye imikhumbi ibiphuma echwebeni iza ngasosebeni ilimala yingakho bebephoqeleke ukuthi bayimise kancane.
UMnuz Mthunzi Gumede, okhulumela iMeya yeTheku uNkk Zandile Gumede, uthe imeya iyalusukumela udaba lwezitamkoko ezingasebenzi kahle okuholela ekutheni imigwaqo eminingi igcwale amanzi.
“Imeya izolulungisa udaba lokuhlanzwa kwezitamkoko kodwa siyacela nabantu bangalahli udoti ngendlela engahlelekile. Siyacela abantu bafonele abophiko lwezimo eziphuthumayo batshele namakhansela abo uma bekhahlanyezwe yimvula,” kusho uGumede.