Injabulo enikwa indlu enobuchwepheshe obusha
UHLULEKE wukuzibamba wachiphiza izinyembezi owesifazane waseRichmond ngesikhathi enikezwa indlu yomxhaso eyakhiwe ngobuchwepheshe obusha.
Indlu kaNkk Nomusa nomyeni wakhe uMnuz Donald Simes ingeyokuqala kwezingu-500 ezizokwakhiwa kuPhase 2 weSiyathuthuka Rural Housing Project.
UNkk Simes uthe ujabule ukuba ngowokuqala ukuhlomula ohlelweni lwezindlu okuhloswe ukuthi luqhutshwe iminyaka emibili.
“Onjiniyela bebengapheli la ngesikhathi kwakhiwa le ndlu. Ngingajabula uma kungenziwa okufanayo kuzo zonke izindlu ezizokwakhiwa. Kwezinye izinhlelo onjiniyela abezi, izindlu zingabi sesimeni esifanele,” kusho yena.
Le ndlu inamakamelo amabili okulala, ifakwe no-ceiling board onobuchwepheshe obenza ukuthi indlu ifudumale uma kubanda, iphole uma kushisa.
UNgqongqoshe woMnyango wezokuHlaliswa KwaBantu KwaZuluNatal, uMnuz Ravigasen Pillay, uthe lolu hlelo luzodla uR60 million.
“Okokuqala ukuthi izindlu zakulesi sifundazwe zifakwe lobu buchwepheshe. Sesibeke eceleni imali engu-R6.3 million wokuthi kulungiswe izindlu ezazakhiwe phambilini ezinezinkinga,” kusho yena.
Uqhube wathi ngaphandle kunezinye izinhlelo zezindlu eziqhubekayo iNhlazuka neZwelethu Housing Project.
UPillay uphinde wanxusa umphakathi ukuthi ungazijeziseli abenzi bokubi. Uthe ukusho lokhu ngoba sekubulewe abantu abathathu kulo masipala. Kubo ubale owayeyimenenja kamasipala uMnuz Sbu Sithole, owayeyiphini lemeya, uNkk Thandazile Phoswa nowayeyikhansela ku-ward 2 uMnuz Sifiso Mkhize.
“Siyaninxusa ukuthi nisebenzisane namaphoyisa ukuze izigilamkhuba ziboshwe, zishushiswe ngala macala. Akukhathalekile ukuthi yiziphi izinkinga esinazo, udlame nokubulalana akusona isisombululo. Engikwaziyo ukuthi kuletha ubuhlungu nosizi,” kusho yena
NgoLwesithathu kuzoba nokhetho lokuchibiyela lokuvalwa kwesikhala sikaMkhize owadutshulwa yindoda engaziwa ngoJuni.
Abagaqele ukuba yikhansela wuMnuz Sicelo Ngubo we-ANC, uMnuz Philani Chiya we-EFF noNksz Nontando Latha we-IFP.