Ikweletwa izigidigidi iNSFAS

SIKWELETWA engaphezulu kuka-R10 billion isikhwama esixhasa abafundi ngezimali yokufunda emanyuvesi nasemakolishi iNational Students’ Financial Aid Scheme (NSFAS).

Lokhu kuvezwe yimpendulo yoMnyango weMfundo ePhakeme uphendula umbuzo kaMnuz Sipho Mbatha, we-EFF ePhalamende. Impendulo yomnyango iveza ukuthi kule mali, u-R6 148 billion ukweletwa abafundi asebethole iziqu kuthi u-R4 billion ukweletwa abafundi abashiya phakathi iziqu bengaziphothulile.

Okhulumela lesi sikhwama, uMnuz Kagisho Mamabolo, uthe bangu-123 512 abafundi abashiya phakathi iziqu abakweleta lesi sikhwama.

Uthe abafundi baqala ukukhokha imali kaNSFAS uma sebehola ngaphezulu kuka-R30 000 ngonyaka.

Uqhube wathi basebenzisana nesikhwama esiqoqa intela iSARS ebanika ulwazi lwalabo abasuke bekweleta lesi sikhwama uma sebesebenza sebekhokha nentela.

“Ubudlelwano bethu neSARS buthela izithelo njengoba sesikwazi ukuthola abakweletayo abangu-29 236 bakwazi ukubuyisa u-R49 million. Kunethimba elibhekene nendaba yokuqoqa izikweletu kanye nomkhankaso wokunxenxa labo abasikweletayo ukuthi babuyise le mali,” kusho uMamabolo.

Uthe ngenyanga bakwazi ukuqoqa u-R40 millino kulaba abakweletayo.

Unxuse labo abaxhaswa yilesi sikhwama asebesebenza ukuthi babuyise imali ukuze ikwazi ukusiza abanye abafundi.

Uthe kulabo abakweletayo abangakafinyeleli kubona bazogcina bebabambile.

“Awekho amahlathi okucasha kulabo abasikweletayo ngoba sizobabamba. Abeze kuthina basitshele ukuthi sebeyasebenza ukuze senze izinhlelo zokuthi sibambe imali singaze sizibambele bona,” kusho uMamabolo.

Uthe imali iyazala zinyanga zonke wathi ukuyiyeka ungayikhokhi kuzokwenza ukuthi sinyuke isikweletu.