Usuka kude uMgxala neGcokama
UMA kukhulunywa ngezilomo emculweni kamaskandi, alisoze lasala ngaphandle igama likaMthandeni “Igcokama Elisha” Manqele wodumo lwengoma ethi Malavisto nethi Xenophobia. UCHARLES KHUZWAYO ukhiphela eshashalazini umholi wezinduna zabalandeli baleli qhawe uMgxala Mchunu.
CHARLES (CK): Kambe ngempela ngubani uMgxala?
MGXALA (MM): NguSandile Muzi Mchunu.
Ngingowokuqala ebantwaneni abane, ngithi bane ngoba omagcino bangamawele.
Amagama abazali bami nguBonokwakhe Mchunu noSikhulekile Ximba. Ngidabuka eMsinga eMachunwini esigodini sasoPhathe. CK: Ngabe uMacingwane usethathile?
MM: Cha angikaganwa futhi anginayo ingane.
CK: Ngokwemfundo, kumi kanjani?
MM: Ngifunde eMhlumba Primary School, ngadlulela eDlamini High, eMqamathi High naseThetha Secondary School. Angilitholanga ithuba lokuqhubekela phambili emuva kukaphumelela u-matric ngenxa yesimo somnotho. CK: Litohozaphi iqhawe? MM: Okwamanje angisebenzi. CK: Uhlanganaphi nomculo kamaskandi?
MM: Ngiqale ngimncane ngoba abanye babaculi engangibathanda oNgxalothi kanye noMahawukela.
CK: Uqale nini ukulandela iqhawe lakho?
MM: Ukulandela iqhawe lami kwakuwu-2013. Ngabona nje omfokaNgalabezi beliphromotha kuFacebook, ngase ngiba nesifiso sokuzwa ingoma eliyidlalayo. Ngenhlanhla ngaxhumana noBhulamngoma wangithumela izingoma ezimbalwa kuWhatsApp. Ngazidlala ngathi uma ngiqeda ukuzizwa ngezwa inhliziyo yami ivuma ukuthi ngingambiza ngeqhawe umfokaManqele. Ngaqala lapho-ke ukuziphushela iqhawe lami njengoba nanamhlanje ngisaziphushela yona le nsizwa yakwaManqele.
CK: Sewuyinduna yabalandeli, yiluphi uguquko ofike nalo?
MM: Noma ngingeke ngikuqinise ngithi kwashintshwa yimina ngoba sibambisene sibaningi kushuni wenkani futhi sonke siyazimisela ngesikwenzayo. Engingakusho nje kudala abalandeli beGcokama kade bewuvilaphela umfaniswano weqembu futhi bebengahlangene kahle hle kodwa mina nozakwethu sikwazile ukukushintsha lokho, namhlanje abalandeli beqhawe bawukhuthalele umfaniswano weqembu futhi bahlangene bayimbumba angeke ubenze lutho. Iqhawe lami likwazile ukuzuza iGold Disc, lazuza indondo yokuqondanisa ukotini, lazuza iPlatinum Disc laphinde lwakwazi ukuvusa umuzi kababa uKuphosakwenyathi.
CK: Mangaki amagatsha abalandeli eseninawo?
MM: Amagatsha esinawo awu-20, uma ngingawabali amancane. Kukhona eseGauteng, eThekwini, eMtuba, eMsinga, Olundi, eMpumalanga e-Ermelo naseWitbank, oThongathi, eStanger, eMgungundlovu, eHluhluwe, eMandeni, eCape Town, eNkandla, eShowe, oPhongolo/Dumbe nasePiet Retief, eJozini, eNquthu, eZimbabwe, eMpangeni/Richards Bay naseGermany.
CK: Ngobani izinduna ezingaphansi kwakho?
MM: USqunga Cele no Madala wakwaMkhonza
CK: Yimuphi umbala eniwusebenzisayo
MM: Sisebenzisa umbala obomvu nomhlophe ngoba iwona mbala ogqamile nokhombisa uthando nokuthula.
CK: Yiliphi igama eniteketiswa ngalo?
MM: Hehehe... kuyaye kuthiwe ezeSkhova
CK: Yini eyenza nakhetha ukulandela iGcokama Elisha?
MM: Into eyenza sakhetha ukulandela Igcokama Elisha ukuthi uyena maskandi owathi mayefika washaya ingoma ekwaziyo ukuthola indawo ezinhliziyweni zethu. Lakwazi ukusesula izinyembezi ezazilokhu zaphuma ngomhlaka-9 Disemba 2009 futhi okukhulu kakhulu ungumculi ozimiselayo uma engena e-studio.
CK: Yikuphi ukudla okukhonzile?
MM: Ngikhonze ipapa nenyama ebomvu eyosiwe ne-wors elosiwe.
CK:Ngaphandle komculo kamaskandi, yiluphi olunye uhlobo olukhonzile?
MM: Ngaphandle kokamaskandi ngizithandela ikwaito.
CK: Ngaphandle kweGcokama Elisha, yimuphi omunye umculi omthandayo? MM: NguZola 7. CK: Iyiphi indawo okhonze ukuzikhiphela kuyo?
MM: Ngeshwa nje angiyena umuntu okhonze ukuzikhipha kodwa kuyaye kwenzeke ngiye kwaKnorrox eNancefield Hostel.
CK: Ebholeni ukhonze liphi iqembu?
MM: Haha ha ngithanda i-Orlando Pirates futhi ngiyasha ngayo.
CK: Yiluphi uhlelo lwethelevishini olungakuphutheli? MM: Ngizikhonzele uZalo nje. CK: Uma kungathiwa khetha inkosi yezinduna, ungakhetha yiphi?
MM: Yabona uSqunga umfokaCele ngingambeka inkosi yezinduna zabalandeli bakamaskandi. Ngalezi zizathu ezilandelayo: Yinsizwa ezithobile lena ayiziphakamisi, uyakwazi ukulalela izikhalo zabalandeli ngokulinganayo futhi ezintweni eziningi azenzayo ukhombisa ukukhula, akakaze aphoxe muntu.