Eyabafe eLoskop isiphenywa yi-Ipid

SESIPHENYWA wuphiko oluphenya amacala enziwa amaphoyisa i-Independent Police Investigative Directorate (Ipid) isigameko sokubulawa kwabalisa baseLoskop abathathu okuthiwa babulawe ngesihluku amaphoyisa.

Okhulumela i-Ipid, uMnuz Moses Dlamini, ukuqinisekisile ukuthi ithimba labo liphenya ngalesi sigameko.

“Siyasiphenya isigameko. Abaphenyi bethu bebefikile endaweni yesigameko emuva kokuthi sithole umbiko,” kusho uDlamini.

Unxuse abangaba nolwazi ukuthi bathinte abaphenyi alolu phiko ku-031 310 1300.

Kulesi sigameko kushone uMnuz Sithabiso Kubheka (23), nabalisa ababili abebesembonini yamatekisi, uMnuz Maponi Duma nomunye okuthiwe uKhanyile.

Ilungu lomndeni elikhulume naleli phephandaba izolo nelicele ukuthi igama lalo ligodlwe ngoba lithi lisabela impilo yalo lithe bayakujabulela ukuphenywa kwalesi sigameko.

“Sifuna ukunxephezelwa ngalokhu okwenzekile bese kujeziswa labo abathintekayo,” kusho leli lungu lomndeni.

Ngokusho kwamalungu alo mndeni amaphoyisa atheleke kulo muzi ebusuku, abafica belele, abavusa ethi abakhiphe izibhamu.

NgeSonto, amaphoyisa akhiphe isitatimende esithi adutshulwa ngesikhathi efika kulo muzi eyokwenza umkhankaso wokulwa nobugebengu.

Athi kulaba abashonile bekukhona nobesolwa ngokubulala kanti abasolwa batholwa nezibhamu.

Umbiko okhishe yi-Ipid nonyaka uveza ukuthi bangu-159 abantu abashone ngenxa yezenzo zamaphoyisa nyakenye, kulo nyaka bangu-207. KwaZuluNatal bangu-51 abantu okuthiwa babulawe amaphoyisa kulo nyaka, babengu-48 ngonyaka odlule.