Ayingabanjezelwa ibhodi yeSABC ngento engaqondakali
SIKE sabhala kule ngosi sincoma indlela iPhalamende ebelenza ngayo ngesikhathi lihlunga abantu abazoqokelwa ukuba ngamalungu ebhodi elawula inhlangano yokusakazela umphakathi kuleli, iSABC.
Sasibonga ukuthi kubonakala sengathi inhloso yazo zonke izinhlangano ePhalamende ukuqikelela ukuthi kuqokwa ibhodi elizokwenza umsebenzi ngendlela futhi nelizobuyisa isithunzi seSABC njengoba leli bhodi lesikhashana lenzile.
Bekunethemba lokuthi sezizoqala izinto zilunge ngoba mukhulu umsebenzi ohlalele ibhodi njengoba lowo obeyisikhulu esiphezulu, uMnuz Hlaudi Motsoeneng, eshiye emoshile.
Kunezinqumo ebesezivele ziguqulwe yibhodi lesikhashana ebeliholwa nguNksz Khanyisile Kweyama.
Nokho ukudembesela kukaMengameli Jacob Zuma ukuqoka labo abangu-12 okuphakanyiswe amagama abo, kuyalishabalalisa leli themba ikakhulukazi ngoba ayikho nento ebambekayo ezwakalayo njengesizathu esenza ukuthi lingaqokwa ibhodi.
NgoSepthemba 6, iPhalamende lavumelana ngamagama abantu okuyibo okufanele baqokwe emva kokuhlunga kwangaphezu kuka-300.
Ukuphatha kwebhodi yesikhashana kwaphela ngoSepthemba 26 nokusho ukuthi sekuphele izinsuku ezingu -15 le nhlangano idunguza ebumnyameni njengoba lingekho ibhodi elilawulayo.
Kuke kwanemibiko ethi enye into ebibambezele ukuthi bekusaqinisekiswa izicucu zemfundo zalabo abaphakanyisiwe kodwa inhlangano ebhekele lokhu, i-South African Qualifications Authority, ikuphikile lokhu yathi yonke into yayiphothula ngezinsuku ezimbili eyayinqunyelwe zona.
Kukhona nezikhundla ezimqoka okufanele zivalwe njengoba kunabantu ababambile kuzo, umsebenzi ongeke uqhubeke uma lingekho ibhodi ngoba yilo okufanele likhethe labo bantu.
I-SABC ingenye yezinkampani zikahulumeni esezihluphile ikakhulukazi uma kukhulunywa ngokulawula imali njengoba ihlale nayo idinga ukutakulwa.
Uma kukhona abantu ababonakala sengathi bangase balungise izinto, akufanele babanjezelwe ngento engaqondakali futhi kufanele kuphele ngempela manje ukuthi kuhlale kugxambukela ipolitiki kulezi zinhlangano ngoba ngenye yezinto enesandla ekuweni kwazo.