Asisezwa lutho ngokwenzeka eMfolozi
MHLELI: Namuhla ngithi ake ngibhale ngibuze umbuzo kubaholi bakaMasipala waseMfolozi.
Ngiyisakhamuzi esihlala eNzalabantu, ngaphansi kobukhosi bakwaMbuyazi. Inkinga yami yile yokungabikelwa lutho ngemisebenzi eyenzeka kumasipala wethu.
Phambilini besifunda emaphephandabeni ngokwenzekayo kuthi uma sivula imisakazo enjengoKhwezi, Igagasi, Nongoma, Rise, Ulundi/ Nguna, Zululand FM uzwe ukuthi iMfolozi yenze lokhu, izokwenza lokhu kuphume nezimemezelo. Ngikhumbula kahle ukuthi obesazisa ngobuciko nangobunono bekuluqweqwe lwentatheli uMnuz Senzo Mbatha. Kodwa kamuva nje asisezwa lutho selokhu kuqashwe abanye sekucwebe isiziba nje.
Lokhu kungumphumela wokuqashana ngekhadi lenhlangano. Ngicabanga ukuthi abahlonishwa bami sebeyalibona iphutha lokuqasha umuntu ongakaze abe yintatheli noma ongazi lutho ngezokwazisa uthi akenze lo msebenzi esikhundleni sokuqasha umuntu onolwazi. Lokhu kuwubuyisela emuva umsebenzi.
Kumanje asizwa lutho, asifundi lutho ngeMfolozi. Sigcine sifunde ngesikhalo sabahlali baseDondotha ababekhomba inkohlakalo odabeni lwezindlu okumele ngabe kade bakhelwa zona. Nalapho labo abakumasipala abakaze baphawule baphendule kodwa kube kuthiwa bangabaxhumanisi.
Baba Mgenge sikhathele ukuzwa ngabanye omasipala emisakazweni nangokufunda ngabo emaphephandeni owethu do. Uma ngivula imisakazo yomphakathi ngifunde namaphepha nakoFacebook ngithola izindaba ngoMthonjaneni, Nkandla, Mhlathuze lutho Imfolozi. Ngabe nithule ngoba ningenzi lutho eMfolozi noma yingoba neswele ozonixhumela ulayini kwabezindaba?
Emveni kokuba uMbatha sesimuzwa ebhala ephinde ebika ngoMthonjaneni uke wazama kancane uSteve Makhanya noThando Ndlovu bebhala ephephandabeni lomphakathi laseMpangeni. Kodwa manje nabo sekuthulekile asisaboni lutho abalubhalile. Cacisani madoda yingoba ningasasebenzi noma yingoba senishaywa ukuqasha ngekhadi niqasha abantu abangawazi umsebenzi? Sipho Mbuyazi KWAMBONAMBI