UKatsande umisa isibindi uKatsvairo
INSIKA yeKaizer Chiefs, uWilard “Salt And Vinegar” Katsande, iqinisa idolo umkhaya wayo uMichelle Katsvairo obolekiswe ngaMakhosi emuva kwesikhathi eqiwa yijezi eNaturena.
UKatsvairo usayine kuMakhosi ekuqaleni kwesizini edlule ehambisana nomkhaya wakhe u-Edmore Chirambandare noLewis Macha waseZambia kubhekwe lukhulu kuyena. Nokho emuva kwesizini ekwiChiefs, umqeqeshi uSteve “Mphathi” Komphela akayibonanga indawo yakhe esikimini sakhe. UKatsvairo ubolekiswe isizini kwiSingida United yaseTanzania. UMacha udedelwe ngokugcwele, wajoyina iBaroka.
UKatsvairo ubekade enengcindezi yokuhamba ezinyathelweni zabadlali baseZimbabwe abafike kwiChiefs bazakhela udumo eminyakeni edlule. Kulaba badlali kukhona uRobson Muchichwa owayeyibamba emuva noTinashe Nengomasha odlale kwiChiefs iminyaka engaphezu kuka10.
“Ngakhuluma naye (uKatsvairo) ngaphambi kokuthi ahambe. Kade ngilandela indlela adlala ngayo, ushaya amagoli. Ngicabaga ukuthi useshaye amagoli amathathu emidlalweni emine noma eyisihlanu. Lokhu akukubi kangako. Kufanele aqhubeke asebenze kanzima, angacabangi ukuthi ubolekiswe ngoba engasadingeki,” kusho uKatsande.
“Uzolithola elinye ithuba uma ebuya ngesizini ezayo. Uzothola ithuba lokukhombisa ifomu akuyona kwiChiefs. Ungumdlali osezingeni eliphezulu, iChiefs isayinisa abadlali abakulelo zinga. Ukhona umuntu owathola ithuba (abanga naye indawo) walisebenzisa kahle. Ngakho yena kufanele abekezele, kuze kube uthola ithuba lesibili ukuze ashaye umsebenzi.”
IChiefs isiqede amasizini amabili ingawinanga neyokubika indebe. Isivele iphunyukwe yindebe yeMTN8 njengoba kuqale isizini ka-2017/2018. Amakhosi awazixakanga ngokuthenga abadlali. Esikhundleni salokho iChiefs isayinise abebekade bephelelwe yizinkontileka kwamanye amaqembu. Ngaphezu kwalokho yanyusela esikimini esikhulu abasuka enkulisa okukhona kubona uWiseman Meyiwa, Khotso Malope obekade ebolekiswe kwiThanda Royal Zulu ngesizini edlule, Nkosingiphile Ngcobo nomgadli uYusuf Bunting obeshaya amagoli eqenjini leMultichoice Diski Challenge. Nokho kuze kube yimanje uKomphela usadlalise uMalope noMeyiwa kuphela.
“Ngibatshelile ukuthi kufanele baqine, bazi ukuthi abezile ukuzokwandisa isibalo kodwa bangamadoda azogxekwa. Sibatshelile futhi ukuthi kuhle ukuthi senidumile kodwa ngomuso nizogxekwa. Kufanele nidlale umdlalo nomdlalo ngendlela efanayo uma ufuna ukuhlala kuleli qembu isikhathi eside,” kuphetha uKatsande.