Kulindelwe iMabhida egcwele koweMTN 8
NAKUBA umdlalo wamanqamu weMTN 8 uzobe ungabophele amaqembu athathwa njengalandelwa yizinkumbi ebholeni lakuleli kodwa abahleli banethemba lokubona iMoses Mabhida Stadium egcwele ngempelasonto.
Umdlalo oqhathe iCape Town City neSuperSport United ukule nkundla yaseThekwini ngoMgqibelo ngo-7 ebusuku.
Amathikithi abiza u-R40 kuthi awezingane ezineminyaka engaphansi kuka-12 abize u-R15. Atholakala ezitolo zakwaTicketPro u-Edgars, CNA, nakwaJet.
ULuxolo September okhulumela iPremier Soccer League (PSL) unxuse abalandeli bakanobhutshuzwayo ukuthi baphume ngobuningi bazokweseka amaqembu.
“Siyacela nani bezindaba ukuthi nilishumayele ivangeli ngalo mdlalo. Sinalo ithemba lokuthi inkundla izogcwala,” kusho uSeptember.
Lona kuzoba wumdlalo wesibili kulo nyaka ukubanjelwa eMoses Mabhida. NgoJuni 24 bekunowawuqhathe i-Orlando Pirates ne-United kowamanqamu weNedbank Cup. Amatsatsantsa a Pitori yiwona aphuma enkundleni esengompetha.
Imenenja yaseMabhida, uVusi Mazibuko, ithe balindele ukuthi isibalo sokuthengwa kwamathikithi sinyuke ngoLwesihlanu nangoMgqibelo.
Umthamo ozokwamukelwa eMabhida owabalandeli abangu-40 000.
“Siyazi ukuthi akudlali amaqembu amakhulu kodwa siyethemba ukuthi abantu bazoza bezobuka umdlalo ngenxa yothando lukanobhutshuzwayo. Okwamanje (izolo) angikabi naso isibalo sokuthi sekudayiswe amangaki kodwa ngokujwayelekile abantu amathikithi bawathenga kakhulu ngosuku olwandulela umdlalo. U-50% wamathikithi udayiswa ngosuku lomdlalo,” kusho uMazibuko.
Izolo eThekwini kuhlasele imvula enamandla ebihambisana nomoya nokuduma kwezulu. UMazibuko uthe namuhla bazohlola ukuthi ngabe ukhona yini umonakalo owenzekile enkundleni.
Uphinde waqinisekisa ukuthi awukho umonakalo owadaleka emasontweni edlule ngesikhathi abalandeli beKaizer Chiefs bevuka indlobane bekhalela ukuhlulwa kweqembu labo yiBaroka FC emdlalweni weligi.
Kukhona abazama ukushisa umpheme osatende ovala iphaseji eliya emagunjini okushintshela kodwa amaphoyisa nonogada basheshe bayibona ingozi.