Udliwe ngababodwa u-10 no-5km oLundi
USULEKE izinyembezi umgijimi ophucwe iqatha emjahweni iThekwini Township To Township Marathon emasontweni edlule, u-Anele Dlamini, ekhala emuka nesicoco sika-10km kwi-Ulundi Marathon ngoMgqibelo.
UDlamini wePhantane AC, uwine u-10km ngo-30:12 wahlomula ngo-R10 000, elandelwa nguThobani Chagwe ngo-30:21 ogoduke noR5 000, isithathu sidliwa nguSiphesihle Masondo ngo-30:41 othole uR3 000. Bekungokwesithathu lo mjaho wasoLundi ugijinywa kodwa kungokokuqala ukuthi uncishiselwe ku-10km ohambisana no-5km.
Kwabesifazane ku-10km kunqobe uJenet Mbele woMzimkhulu Striders ngo-35:19 elandelwa nguNwabisa Mjoli ngo-36:57.
Ku-5km kuphinde kwaphuma phambili bona labo abathathu abawine umjaho ka-10km, kuhamba phamibili uMasondo, elandelwa nguChagwe noDlamini.
Emasontweni edlule, uDlamini uhluleke ekugcineni ukudla umhlanganiso emjahweni iThekwini Township To Township.
“Ngijabule ukuwina umjaho emuva kwento eyenzeke eThekwini ngeledlule. Ngihluleke sekusele amakhilomitha amane, ngagcina ngiphume endaweni yesikhombisa,” kusho uDlamini.
“Bengazi ukuthi ngizokwenza kahle ngoba indlela obekugijinywa kuyona ngiyayazi, kuhamba khona umjaho iZululand Marathon. Angisho ukuthi abanye abagijimi bengibabukela phansi kodwa ngijabule kabi ngesikhathi ngithola ukuthi sizogijima kuphi.”
Nakuba abagijimi bezinga eliphezulu bebengaphumile ngobuningi babo kodwa abafikile bakubeke obala ukuthi badotshwe yimali ekhokhwa yilo mjaho.
Imeya yasoLundi, uWilson Ntshangase, ibonge uMnyango weZemidlalo ngokubalekelela, iKZN Athletics noMkhandlu ngokugunyaza umjaho.
“Ukugijima kunemali phakathi. Kungokwesithathu lo mjaho siwenza. Saqala ngo-15km, senza u-42km ophela emayini Okhukho. Njengoba silapha ku-10km, sithembele kwiKZN Athletics ngokwekhalenda yayo ukuthi yiliphi ibanga esingaligijima. Siyethemba ukuthi ngonyaka ozayo kuzoba ngcono, bayosinika noma u-21km noma-42km,” kusho uNtshangase.