UBaxter uzakhele ugazi kwawePSL
ISINQUMO somqeqeshi weBafana Bafana, uStuart Baxter, sokuhoxisa ukuziqeqesha kwaleli qembu lesizwe obekufanele kwenzeke ngoMsombuluko sizomakhela ugazi kubadlali bakhe abazinze phesheya kwezilwandle nasemaqenjini adlala kwiPremier Soccer League (PSL).
IBafana ebuyise ithemba ngeNdebe yoMhlaba eseRussia ngo-2018 ngokunqoba ngo 3-1 kwiBurkina Faso ngoMgqibelo eGoli, bekumele ibe nomdlalo wobungani izolo kodwa ngenxa yezizathu iSouth African Football Association (Safa) engazange izidalule, umdlalo ubhuntshile.
Lokhu kulandelwe ukuthi uBaxter akhulule abadlali bakhe ekhempini ngokushesha ukuze laba abalimele babuyele emaqenjini abo bayohlolwa kusenesikhathi ukuthi babuyele kwi-Absa Premiership. Ngaphezulu kwalokhu isinqumo sikaBaxter sinike abadlali beBafana abadlalela amaqembu aphesheya kwezilwandle ithuba lokwandisa amahora abebezowachitha nezihlobo nabangani ngaphambi kokuthi babuyele emsebenzini.
“Ngemuva kokuhlanganisa amakhanda nethimba lami, sibone kuzoba ngcono ukuthi singahlangani ngoMsombuluko. Phakathi kwezizathu ezisiphushele ekutheni sigcine ngokunquma lokhu wukuthi bebevele bebaningi ekhempini abadlali abashayekile emdlalweni wangoMgqibelo.
“Sibone kuzoba ngcono ukuthi baphumule bese bephinda bebuyela emaqenjini abo ngokushesha,” usho kanje uBaxter kwi-website yeSafa.
UBaxter ukholelwa ekutheni ubudlelwano bakhe namaqembu adlalelwa ngabadlali bakhe kwiBafana kufanele buhlale buseqophelweni eliphezulu ngaso sonke isikhathi.
“Asikufihli ukuthi sifuna ukuhlale sizwana futhi sixhumana namaqembu abadlali beqembu lesizwe. Kube lula kithina ukunquma ngoba besibona nethuba lokuthi abadlali baphesheya bathole amahora athe xaxa ukuwachitha nabathandiweyo babo ngaphambi kokungena ezindizeni sebebuyela emsebenzini. Nabo laba abasekhaya kubalulekile ukuthi uma sinalo ithuba lokusheshe sibabuyise sikwenze lokho. Kuyoba olukhulu usizo kithina lokhu ngelinye ilanga,” kusonga uBaxter.
IBafana imelwe yimidlalo enzima ngenyanga ezayo lapho izobhekana khona neSenegal ekhaya nasekuhambeni ngoNovemba 10 ePolokwane nangoNovemba 14 ekuhambeni. Amawini amabili eBafana azosho ukuthi leli qembu liya kwiNdebe yoMhlaba eseRussia ngonyaka ozayo.
Phakathi kwabadlali beBafana abathintekile kukhona u-Itumeleng Khune weKaizer Chiefs no-Andile Jali odlala phesheya.