Angayishiyiswa ukuya phesheya iDowns uZwane
AKAZIBONI edlalela elinye iqembu ngaphandle kweMamelodi Sundowns uThemba “Mshishi” Zwane osefomini enhle kulezi zinsuku.
UZwane (28), inkontileka yakhe iyaphela ngoJuni kwiSundowns kodwa kuze kube yimanje akakayivuseleli. Exoxa neSolezwe ukusho kwagcwala umlomo ukuthi akaziboni egijima kwelinye iqembu kwi-Absa Premiership.
“Isifiso sami esikhulu wukuyodlala phesheya. Uma kungenzeki lokho ngizohlala kwiSundowns. Angiboni ukuthi likhona elinye iqembu engingadlala kulona kodwa-ke phela ebholeni ngeke washaya phansi ngonyawo,” kusho uZwane.
Ngempelasonto uZwane usize iBafana yathela othulini iBurkina Faso ngo 3-1 emdlalweni wokuhlungela ukuzibekisela indawo kwiNdebe yoMhlaba engonyaka ozayo eRussia. IBafana iqumbe phansi amaStallions ngamagoli kaZwane, Sibusiso “Villa” Vilakazi noPercy Tau, bonke abadlalela iSundowns.
Ngesizini edlule uZwane ufake isandla empumelelweni yeSundowns kwiCAF Champions League kwathi ekuqaleni konyaka wabamba iqhaza ngesikhathi leli qembu lithela othulini iTP Mazembe kwiCAF Super Cup.
“Sisaxoxa neqembu kodwa okwamanje akukho esisavumelene ngakho. ISundowns iyona engizoyinika ithuba lokuqala. Ngeneme kwiSundowns kodwa uma kuvela ithuba lokuya phesheya ngeke ngiliyeke. Ozakwethu engidlale nabo asebeyibamba emaqenjini aphesheya kwezilwandle, yibona abangikhuthazayo futhi abangifaka ugqozi,” kusho uZwane.
Ozakwabo akhuluma ngabo asebedlala e-Europe nguBongani “Ben10” Zungu noKeagan Dolly bobabili abagijima eFrance. Bobabili udlale nabo kwiSundowns futhi udlala nabo kuBafana.
“Ukudlala kwiChampions League kungenze ngaqina ngokomqondo. Njengamanje sekulula ukubhekana nezimo ezinzima ngisho ngidlala kwelesizwe. Ngizimisele ngokuqhubeka nokusebenza kanzima,” kusho uZwane.
Njengamanje iBafana isidinga ukunqoba imidlalo yayo emibili esele ezoyidlala neSenegal (ekhaya nasekuhambeni) bese izibekisela indawo kwiNdebe yoMhlaba eseRussia ngonyaka ozayo.
“Konke kuncike kithina njengamanje. Awukho umqhudelwano omkhulu ukwedlula iNdebe yoMhlaba. Okuhle wukuthi sonke siyakwazi okufanele sikwenze. Siwubukile sonke umdlalo weSenegal neCape Verde. Kumele sinqobe ekhaya siphinde sinqobe nasekuhambeni. Uma sizimisele ngicabanga ukuthi sizokwazi ukunqoba njengoba senzile kwiBurkina Faso,” kusho uZwane.
Emdlalweni olandelayo we-Absa Premiership iSundowns izobhekana neKaizer Chiefs ngoLwesibili oluzayo.