Umsakazi ubulawe wugesi ngemuva kokugubha olokuzalwa
UMSAKAZI wesiteshi somphakathi saseMgungundlovu iKZN Capital 104.5 FM uMfu Thamsanqa ‘Pastor K’ Morris Khanyile ushaywe wugesi washona ekwakhe eSlangspruit izolo ngemuva kokugubha ukuqeda iminyaka engu-50 azalwa. UPastor K obengumfundisi wase7th Day Adventist, ubethi ukhanda ibhakede elinentambo kagesi elaziwa ngokuthi iMini-Gyser kanti uzomshokha.
Inkosikazi yomfowabo kamufi, uNkk Qiniso Khanyile ithe uPastor K ubelungiselela ukuyogeza ngesikhathi ehlelwa yilesi sigameko ngezithuba zabo 7 ekuseni. “Unkosikazi wakhe akamzwanga kodwa umfice esebhuquza phansi, esha. Naye uthe uyamthinta washokheka kwaze kwadingeka ukuba kwehliswe i-main switch kwenye indlu. Bamphuthumise esibhedlela kodwa udokotela wafike wathi akasekho emhlabeni,” kuchaza uNkk Khanyile.
Uthe uPastor K ulale ngayizolo kumnandi ekade egubha usuku lokuzalwa nomndeni wakhe.
Ubesakaza uhlelo lomculo kamaskandi oluthi Sigqashiya Ngezomdabu noMngeniseni ‘Mngeni’ Ndlovu no-Andile ‘Shange’ Buthelezi ngeMgqibelo. Uzakwabo kaPastor Khanyile, uMngeniseni uthe bagqemeke ingozi engeqiwantwala ngokudlula emhlabeni komfundisi ngenxa yeqhaza lakhe. “Ubeyikho konke kithina, efana nobaba. Njengoba siphuma sekuntambama, ubesithatha ngemoto yakhe ayosibeka ezitobhini. Kuningi esikufunde kuyena njengokuphatha kahle umkakhe,” kusho uMngeniseni.
UPastor K ushiye izingane nenkosikazi uNomusa Khanyile.
Esephetha uNkk Khanyile uthe amalungiselelo okufihla umufi abengakaphothulwa.
Okhulumela amaphoyisa uCaptain Nqobile Gwala usiqinisekisile lesi sigameko.
Uthe bayaphenya ngaso.