I-SIU ibuyise izigidi ebeziphuma ngesinxele kuhulumeni
ISPECIAL Investigating Unit (SIU) ibuyise uR126 million obuwebiwe ezinkampanini zikahulumeni yaphinde yamisa izinkontileka zemali elinganiselwa kuR4 billion ebezizokhishwa onyakeni ka-2016/17.
Inhloko yeSIU, uMnuz Andy Mothibi, itshele amalungu ePhalamende ukuthi bayayivimba inkohlakalo njengoba bewine amacala abezodla uR300 million.
“Siphinde sabuyisa uR43.5 million wempahla ebithathiwe. Saphinde savimba ukumosheka kuka-R106.5 million. Thina besilindele ukuqoqa u-R18 million kodwa size seqa kule mali sakwazi ukubuyisa imali eningi,” kusho uMothibi.
Phakathi kwezinkontileka ezivinjwe yiSIU ukuba zikhishwe ngoba zinogcobho kubalwa ekaR651 million ebizonikwa iGijima nguMnyango wezoLwazi nobuChwepheshe, kube nguR756 million obukhishwa nguMnyango wezokuXhumana obuzokwenza uhlelo lwe-digital migration oluzoshintsha ezokusakaza kwithelevishini.
Enye inkontileka emisiwe ngekaR2.5 billion ebikhishwa nguMnyango wezokuThutha uzoyinika iTasima.
UMothibi uthe baphinde bonga uR3.8 billion ngamacala obekumangalelwa kuwo izinkampani zikahulumeni.
Uthe bazophinde bafake icala enkantolo eNkulu yaseMgungundlovu njengoba befuna kubuyiswe uR155 million owakhokhelwa uMnuz Minenhle Makhanya owayengamele umsebenzi wokuthuthukiswa komuzi kaMengameli Jacob Zuma oseNkandla.
“Ngithole umbiko wokuthi abameli bakaMakhanya sebehoxile. Lokhu sikujwayele emacaleni alethwa kuthina. Sinamacala angu-108 esiwathumele ophikweni lwezokushushisa nangu-137 esiwadlulisele eminyangweni ukuthi ishushise abanamacala,” kusho uMothibi.
Uthe kunophenyo oluqhubekayo olwenziwa kwa-Eskom, nakwaSITA.
“Siyathanda ukusebenzisana nezinkampani zikahulumeni ukuze sizichazele ngomsebenzi wethu. Sikholwa wukuthi singazisiza ngendlela efanayo kwezomthetho nezinkampani ezizimele,” kusho uMothibi.