I-IEC isemkhankasweni wokuqoqa amakheli kubavoti

Isolezwe - - IZINDABA - MHLENGI SHANGASE

IKHOMISHINI eyengamele ukhetho kuleli, i-Independent Electoral Commission (IEC), isemkhankasweni wokuqoqa amakheli kubavoti bakuleli njengoba bengu-3 million abangenawo.

Bangu-4 million abantu amakheli abo angaphelele njengoba bengu-26 million abavoti kuleli.

Izolo, esithangamini nabezindaba eGoli, isikhulu esisha sale khomishini uMnuz Sy Mamabolo, sithe u-19 million kuphela wabantu bakuleli abangabavoti onamakheli aphelele.

Uthe ukhona umnyakazo mayelana nokuqoqwa kwamakheli kubavoti wathi kuningi okusamele bakwenze ukuhlangabezana nemigomo ebekwe ngumthetho.

“Inkantolo yomthethosisekelo yasibekela imigomo nomnqamulajuqu odabeni lokuthi kumele abavoti babe namakheli.

“Ukungabikhona kwamakheli kushiya ungabazane njengoba kukhona abantu asebefaka izimangalo befuna kuhlehliswe ukhetho lokuchibiyela nonyaka njengoba bethi umqulu wokuvota awuphelele,” kusho uMamabolo.

Uthe umgcinimafa uzibophezele ekutheni uzotshala imali engu-R180 million onyakeni ozayo wezimali ukusiza ngendaba yokuthi kutholakale amakheli.

Uqhube wathi bafuna ukuthi kushaye ukhetho lukazwelonke ngo2019 abe esekhona amakheli.

Nyakenye inkantolo yezokhetho yaphoqa i-IEC ukuthi ihlehlise ukhetho lokuchibiyela eTlokwe eNorth West ngenxa yokuthi umqulu wokuvota wawungaphelele njengoba amakheli ayengekho.

Inkantolo yanika i-IEC kuze kube uJuni wonyaka ozayo ukuthi bonke abavoti babe namakheli acacile.

Amaqembu aphikisayo aya enkantolo efuna le khomishini ihlinzeke ngamakheli ukuze kube nobufakazi ukuthi bonke ababezovota babehlala kule ndawo.

IPhini likaSihlalo we-IEC, uMnuz Terry Tselane, lithe kunezinselelo ukuqoqa amakheli abavoti kuleli.

Linxuse abavoti ukuthi basebenzise i-website yale khomishini ukubhalisa amakheli abo.

Umkhankaso wokubhalisa ngeinternet uqondiswe kwabangenawo amakheli, angaphelele, asebeshintshe indawo yokuhlala nalabo abasahlala endaweni angashintshile nabo kumele bawaqinisekise ukuthi awakashintsi.

Ngonyaka ozayo le khomishini ihlela ukuthi kulabo abangenayo i-internet, ibavulele izikhungo zokuvota ukuze bakwazi ukugcwalisa amakheli abo.

Abafuna ukusizakala bangashayela le khomishini phakathi nezinsuku ku-0800 11 8000 kanti i-website abangaya kuyona ithi: www.elections. org.za/MyIEC

Newspapers in Zulu

Newspapers from South Africa

© PressReader. All rights reserved.