Uzocela ibheyili owalahla ingane
UZOFAKA isicelo sebheyili ngoLwesihlanu owesifazane oboshelwe icala lokulahla ingane yakhe enezinyanga ezingu-18 emgwaqweni eThekwini wasenga ezimithiyo wathi ubeyibambise umuntu.
Lo wesifazane oneminyaka engu19 uvele enkantolo yeMantshi ngoLwesihlanu olwedlule icala lahlehliselwa ikusasa ukuze afake isicelo sebheyili.
Ingane yomfana itholwe ilalisiwe emgwaqweni uPine ngo-Okthoba 3 nonyaka, imbathiswe kahle.
Unina ekuhambeni kwesikhathi kuthiwa wafika esiteshini samaphoyisa esiseThekwini ezofuna ingane yakhe ethi ilahlekile.
Lo wesifazane kuthiwa wathi ingane ubeyiphathise omunye umuntu wabuya engasabonwa nengane.
Ephonswa imibuzo ngalo muntu amphathisa ingane, lo wesifazane uhlulekile ukuphendula zabe sezimkhalela.
Lo wesifazane kunezinsolo ukuthi wayezihambele izindawo zakhe, ebona ukuthi ingane izomphazamisa wabe seyishiya emgwaqweni ngethemba lokuthi kukhona ozoyibona bese ebikela amaphoyisa.
Okhulumela amaphoyisa eThekwini uCaptain Khephu Ndlovu, uthe lo wesifazane uzobhekana necala lokulahla ingane.
“Ingane enezinyanga ezingu-18 yatholwa igqokiswe kahle ilalisiwe eceleni komgwaqo lapho kuhamba khona abantu. Yathathwa yayiswa esiteshini samaphoyisa, kwavulwa icala lokulahlwa kwengane. Unina wengane uboshwe ngesikhathi ezoyifuna,” kusho uNdlovu.
Uthe amaphoyisa aseThekwini ngeke akumele ukulahlwa kwezingane ikakhulukazi njengoba sekuzoba yisikhathi samaholidi.
“Abantu abalahla izingane zabo bamosha isikhathi samaphoyisa nezinsiza-kusebenza ezisetshenziswa sizama ukuthola abazali bengane esuke ilahlekile. Ngeke sibayeke omama abalahla izingane, bazoboshwa,” kusho uNdlovu.
Kumanje ingane igcinwe ngosonhlalakahle kuze kube kuphothulwa uphenyo.