Abefundisi abasisize kwezempilo
ISIZWE esizihloniphayo nesiphilile siyisizinda nomgogodla kwezenhlalakahle nentuthuko enqala kwezomnotho. Akumangalisi-ke ukuthi ezempilo ziseqhulwini emisebenzini kahulumeni. UMnyango wezeMpilo KwaZulu -Natal ungomunye kwehamba phambili kuleli ngokuhlinzeka umphakathi ngezempilo. Lapha singabala izinhlelo zokulwa nokubhebhetheka kweHIV njengokusokwa kwabesilisa ngaphansi kohlelo lweMedical Male Circumcision, ukuhlinzeka ngemishanguzo kulabo asebehaqwe yileli gciwane nokwakhela umphakathi izikhungo zezempilo, ikakhulukazi eyasemakhaya.
Nokho naphezu kwemisebenzi emihle nempumelelo yomnyango ezempilo ekulweni nezifo, ingcindezi yomthwalo ayehli njengoba izibalo zikhomba ukuthi siyanda isibalo samantombazane asuleleka ngesandulela gciwane lengculazi. Kanjalo futhi umnyango wezempilo ubhekene nengcindezi yokwelapha nokuhlenga abalimala ngenxa yezigameko zodlame nezingozi zomgwaqo. Kuyacaca ukuthi umsebenzi obhekene nomnyango udinga kubanjiswane nazo zonke izinhlaka nabaholi bomphakathi.
Siyayithakasela indlela abaholi bezenkolo abaphendule ngayo emva kokuba sihlabe ikhwelo lokuthi babambisane nomnyango wezempilo ukuze sonke siphilise isizwe sakithi. Bafike ngobuningi engqungqutheleni ebesibamemele kuyo eThekwini. Inhloso bekuwukungqumuza izindaba ezibalulekile ezibhekene nempilo yesizwe. Kulo mhlangano abaholi bezenkolo bazibophezele ekubambisaneni nathi emkhankasweni wokufundisa nokuqwashisa umphakathi ngezifo nezindlela zokuzigwema.
Sikholwa ukuthi njengoba abaholi bezenkolo behlonishwa kangaka emphakathini, likhulu iqhaza abangalibamba ekuhlomiseni abantu bakithi ngolwazi lwezempilo nokuqinisa idolo abasebenzi bezempilo nokuvuselela onembeza kwabanye. Lo mkhankaso awumusha. Empeleni lapha sivuselela ubudlelwano phakathi kwethu nezinhlaka ezahlukene zomphakathi njengoba sivele sisebenza ngokubambisana nabaholi bendabuko. Futhi siyasebenzisana nabelaphi bendabuko abakwazi ukwelapha izifo ezithize. Kuyasithokozisa ukuthi njengoba sesibaqeqeshile sebekwazi nokuthi uma bebona izimpawu ezithile ezigulini, njengokujuluka ngokweqile, ukuncipha komzimba, nokukhwehlela isikhathi eside bese bezeluleka, bazidlulisele ezikhungweni zezempilo. Lokhu kusisiza kakhulu nasekunqandeni ukubhebhetheka kwezifo ezifana nesofuba neHIV kubantu.
Muva nje sizoqala izinhlelo zokuthi siqeqeshe abefundisi, sibanike ulwazi abazoludlulisela kubantu ezinkonzweni ukuze baguqule indlela abaphila ngayo. Lokhu kuzokwenza abantu bakithi bazi ukuthi izifo zigwenywa kanjani; bazi futhi nangobungozi bokudla ukudla okunamafutha, ushukela nosawoti omningi; nangokubaluleka kokuzivocavoca, ukwenza nje izibonelo ezimbalwa.
Sifisa ukuthi abefundisi bangesabi ukuyala abasebenzi bezempilo abakhonza kubona ngokubaluleka kokuphatha kahle iziguli. Lokhu sikwenza ngoba akusizi ukuthi umuntu okholwayo anikele kakhulu esontweni kodwa ebe ekhombisa ukungazikhathaleli iziguli. Njengoba sihlale sisho, umsebenzi wezempilo ufana nongcwele. Ngaphezu komsebenzi obalulekile owenziwa odokotela nabahlengikazi ukuhlenga iziguli ngokwenyama, impilo yomuntu incike kakhulu nasekuphileni ngokomphefumulo. Ngakhoke, inkulu indima engadlalwa abefundisi ukubuyisa ithemba kubantu abagulayo. Sifisa ukusebenzisana kwethu nabefundisi kudlondlobale kuze kufike lapho bezoba nezigqebhezana abazongena ngazo ezikhungweni zezempilo ukuze bazokhulekela iziguli bazinike ithemba.
Abefundisi sifisa basisize ngalokhu, phakathi kokunye:
*Bashumayele ivangeli lokuthi intsha izithibe ocansini; kuthi leyo ehlulekayo izivikele ngaso sonke isikhathi ngokusebenzisa ijazi lomkhwenyana nezinsiza zokuhlela imindeni kwabesifazane
*Babambisane nathi ekukhuzeni umhlola wabantu abadala abajola nezingane ezincane ngenxa yezinkanuko ngoba badlala ngazo, bazikhulelise noma bazithelele ngezifo bese beyazilaxaza
*Bagqugquzele omakoti abakhulelwe ukuba baye ezikhungweni zezempilo ukuze bahlolwe, kubonakale nokuthi abanazo yini izifo ezithile ukuze uma zikhona zisheshe zinqandwe
*Bagqugquzele abazali ukuba basoke abantwana babo ngoba lokhu kuyasiza ukugwema ukubhebhetheka kwezifo ezithelelana ngokocansi. Kuphinde kusize ngokucija abafana abancane ukuthi bakhule babe amadoda aqotho njengoba sibafundisa ngokubaluleka kokuzihlonipha, bahloniphe abantu besifazane nabantwana. Bangasisiza kakhulu ukuqeda umkhuba omubi wentsha wokuthanda izinto eziwubukhazizikhazi nezibizayo engakwazi ukuzithengela zona, njengamaselula, izingubo ezibizayo nezinwele zokufakelwa. Lena enye yezinto eyenza iziphose kulabantu ababizwa ngama-Blesser, o-Suggar Daddy, noma iphenduke o-Ben 10. Kufanele sifundise abantabethu ukulinda, bafunde baze bathole umsebenzi ukuze bakwazi ukuzithengela abakudingayo.
Sifisa futhi ukuthi abefundisi bagqugquzele nabantu besilisa ukuba bahlukane nomkhuba wokuhambela kude nezikhungo zezempilo.
Sifuna kuphele nokuthi amadoda azishaye isifuba ngokuthi wona awahlangani nodokotela ngenxa yokuthi aqinile, futhi anamandla. Lokhu kuyimfeketho ngoba ukungayi esikhungweni sezempilo ngoba uzizwa ungaguli akusho ukuthi akukho sifo esikukhokhobelayo. Ukuya kohlolwa kusiza ngoba siyaye sikwazi ukubona izifo, bese sizinqanda zingakadlondlobali. Sifisa kuphele futhi ukuthi amadoda angayi kohlolela igciwane lesandulela ngculazi (HIV) ngoba ethembele ekutheni “ahlolelwa” wophathina bawo. Lokhu kuyingozi ngoba kuyenzeka ukuthi kubantu abaya ocansini olungavikelekile kube khona onalo igciwane nongenalo.
Nakuba senza konke okusemandleni ukuhlenga zonke iziguli ngaphandle kokuzicwasa, ngeshwa kunabantu abagula baze bafike esigabeni lapho bengasalapheki khona. Kunomkhakha kwezempilo obizwa nge-Palliative Care, okuhloswe ngawo ukuqinisekisa ukuthi abantu abakulesi sigaba sempilo banikwa isithunzi, kuncishiswe ubuhlungu ababuzwayo nokuhlupheka kwabo jikelele. Lapha alikho iqhaza elingadlula lelo elingabanjwa abefundisi ukududuza lemiphefumulo njengoba bekwazi nokukhanyisa indlela yomuntu uma esezohamba emhlabeni. Ngakho konke lokhu, sinethemba ukuthi abefundisi bazoqhubeka nokubambisana nathi ekufezeni inkambo yethu yokulwa nezifo; ukulwa nobubha nokunika ithemba.
UDkt Dhlomo uwuNgqongqoshe wezeMpilo KwaZulu-Natal.