Owesifazane wakhe inkulisa eMpangeni
UMPHAKATHI waKwaDlangezwa, eMpangeni, uzincinza inqulu ngenxa yegxathu elithathwe ngusomabhizinisi wendawo lokufukula ezemfundo kule ndawo.
UNksz Lindiwe Dube ungusomabhizinisi uphinde abhekele ezokukhangisa nokwazisa enxanxatheleni yezitolo iSanlam Centre eMpangeni. Uthe uthathe isinyathelo sokwakha inkulisa iVukuzakhe ukuze kusizakale omuntuza, kuphinde kuvuleke namathuba emisebenzi.
Lokhu kulandelwa wuhlelo olukhombisa ukuthakaselwa ngabazali nentsha lweCreative Corner asophondweni lwalo olusenxanxatheleni yezitolo iSanlam Centre eMpangeni.
Uthi iCreative Corner isiza abafundi ngolwazi, ezobuciko nokuthi bakwazi ukuthola izinsiza zokutadisha ngaphakathi eSanlam Centre.
Konke lokhu uthe ukwenza ngenxa yokukhathalela imfundo nekusasa eliqhakazile lezingane.
“Konke kuhamba ngohlelo, sifuna izingane zakule ndawo zingasweli emfundweni. Zingaze ziye ezindaweni ezikude kodwa thina njengomphakathi asizenzele okwekhethelo,” kusho uNksz Dube
Uthando lwakhe lomphakathi nenqubekela phambili, luphinde lubonakale ezinhlelweni amatasa ngazo kule ndawo.
Ubonga izivivinyo nezinselelo ake wahlangabezana nazo esakhula, njengezimenze umuntu onesineke nozwelo kwabantulayo.
UNksz Dube uthe ekhula wayefisa ukuba ngummeli.
“Ngikhule nginezifiso eziningi, ikakhulukazi ezithinta ukusiza abantulayo, izingane nabantu asebedala ngokuthi bavikeleke ngokwezomthetho,” kusho uNksz Dube.
Uthe ngenxa yezingqinamba zasekhaya, ugcine eseyofunda iHuman Resources eVest Tech esibizwa ngoMfolozi College manje.
Ngemuva kokuthola iDiploma yeHuman Resources, uthole umsebenzi kodwa wabuye wayoqala ukufundela ukuba ngummeli. Kulapho ehlangabezane nesimo esiholele ekutheni ame ekufundeni.
“Ngathola ingane emgwaqweni ngayithatha ngayikhulisa.”
Uthe ukuze akwazi ukuyinakekela, wakhetha ukushiya izifundo zakhe.
“Uma sonke singafaka isandla kwabaswele sibe nozwelo kubona, nabo bayokwenza okufanayo kwisizukulwane esilandelayo. Lokhu akusho ukuthi kufanele sikwenze kwabegazi lethu kuphela.”
UNkzs Dube ungumnikazi weLindzwa Foundation, esizakhele igama ngokusiza iziboshwa ezisafunda, ophikweni lwejele iQalakabusha Secondary lapho ziba nezinkulumo mpikiswano khona.
Uphinde ahlele umcimbi wezindondo zaminyaka yonke zosomatekisi iSouth African Taxi Industry Awards, ayibona iyindlela yokukhuthaza abakule mboni.