Sisebenzisana kahle nethimba lami: Larsen
UKUSEBENZISANA okuhle okukhona phakathi kwethimba lakhe lokuqeqesha yikhona okukhonjwa wuClinton Larsen njengembangela yokwenza kahle kweLamontville Golden Arrows.
ULarsen uhlomule ngomklomelo womqeqeshi ovelele wePremier Soccer League (PSL) ngo-Agasti noSepthemba.
Sekungokwesibili ehlomula. Nasekuqaleni kwesizini edlule uhambe nawo. Ukuqala kahle kwaBafana Bes’thende yikona okube yisisekelo sokuthi bagcine bethole indawo kwiTop 8 ekupheleni kwesizini edlule.
Nakulokhu i-Arrows ilele endaweni yesibili kwilog ye-Absa Premiership. Emidlalweni eyisikhombisa isiqoqe amaphuzu angu-13 ngemuva kokunqoba imidlalo emithathu yadlala emine ngokulingana.
“Kuyajabulisa ukuthola umklomelo njengomqeqeshi ovelele kodwa konke lokhu akwenzeki ngenxa yami ngendwa. Ngisebenza ngokubambisana noMandla Ncikazi, Vusi Vilakazi, Papi Zothwane noLindani Shezi. Ngibonga bona ngomsebenzi esiwenzayo eqenjini.
“Umklomelo uzosikhuthaza kakhulu. Siyazi ukuthi isephansi kakhulu imidlalo, usemkhulu umsebenzi kodwa sijabule ngesikuzuzile. Iqembu lizinzile, lakhiwe abafana abancane abadlala ibhola elihehayo okuyinto enhle uma sibhekelela ingomuso,” kusho uLarsen.
Uma sekubuywa ekhefini i-Arrows izovakashela iBaroka FC okuyiyona eqhwakele kwi-log ngamaphuzu angu-15. Nayo iBaroka, yaseLimpopo, ayikayitholi induku kwiligi. Umdlalo usePeter Mokaba Stadium ngoLwesithathu ngo-7.30 ebusuku.
“IBaroka ihluke kakhulu kunalokhu ebiyikho ngesizini edlule. Ngiyambongela umqeqeshi uKgoloko Thobejane ngendlela alihlanganise ngayo iqembu. Kodwa engikuthandayo ngeqembu lami wukuthi sesiyakwazi ukuya ekuhambeni sibuye nemiphumela emihle,” kusho uLarsen. ULarsen nethimba lakhe uma bengaqhubeka nokugcina umgqigqo ngokuthi babuye namaphuzu agcwele ePolokwane bangaba sethubeni lokudla ubhedu kwi-Q Innovation yokuqala yePSL. Iqembu okuphela imidlalo eyisishiyagalombili yokuqala seliqoqe amaphuzu amaningi lihlomula ngo-R1.5 million.
“Indaba ye-Q Innovation ayikho emiqondweni ngoba akhona namanye amaqembu asenethuba – iSundowns neSuperSport. Engikufunayo wukuthi iqembu lami liqhubeke nokudlala ibhola elihle noma ngabe kuthiwa kuyafika ukuthi sihlulwe kodwa kube wukuthi besingaphumile kulokhu engikufunayo.”
Uveze ukuthi abadlali abebelimele uMatome Mathiane, Jabulani Shongwe noLehlohonolo Nonyane sebeluleme.