Bacela ukuvotelwa abagijimi baseMzansi
BASANXENXA abalandeli ukuba babavotele abasubathi baseNingizimu Afrika abashaye into ecokeme kulo nyaka baqokelwa emunxeni we-IAAF World Athlete of the Year.
ULuvo Manyonga ongumpetha womhlaba kwi-long jump, ukhumbuze abalandeli ekhasini lakhe le-twitter ukuthi baqhubeke nokumvotela ngaphambi kokuthi kushaye usuku lomnqamulajuqu, u-Okthoba 16. Umcimbi uzokuba seMonaco ngoNovemba 24.
“Ngiyacela niqhubeke nokuvota sezincane izinsuku ezisele,” kubhala uManyonga ku-@ lvjumper7.
Ukufaka ivoti kudinga ukungena ekhasini le-twitter le-International Association of Athletics Federations (IAAF) ku-@iaaforg bese uciphaza u-retweet lapho ubona isithombe sikaManyonga. Enye indlela elula wukungena ekhasini lakhe bese wenza okufanayo.
UManyonga ubuye negolide kwi-IAAF World Championship. Ibanga lika-8.65m aligxuma kuma-SA Champs ngo-Ephreli yilona elide eselike lagxunywa eminyakeni eyishumi. Uphethe isicoco salo nyaka se-long jump kwi-IAAF Diamond League.
Nabanye ozakwabo ungabavotela ngokwenza okufanayo ku-@iaaforg noma emakhasini abo. Umpetha womhlaba ku-800m uCaster Semenya osemunxeni wabesifazane, uzibiza ngo-@ Caster800m.
USemenya uqhubekile nokungahlulwa emijahweni ayigijimile kuleli banga. Uhlomule ngegolide kumaWorld Championship eLondon ngo-Agasti. Uphinde wadla umhlanganiso kwi-Diamond League okwesibili iminyaka ilandelana. Lo mgijimi waseLimpopo ukhombise ithalente eliyisimanga etholela iNingizimu Afrika indondo yethusi ku-1500m eLondon.
UWayde van Niekerk uvikele ngempumelelo isicoco somhlaba sika-400m kumaWorld Championship. Ubuye wahlabana ngesiliva ku-200m.
Amavoti abazowathola ezinkundleni zokuxhumana azobala u-25% kuthi u-50% utholakale kwisigungu se-IAAF, omunye u-25% uqhamuke kumalungu e-IAAF.
UHestrie Cloete nguyena kuphela umdlali waseNingizimu Afrika oke wanqoba lo mklomelo we-IAAF ngo-2003. UCloete owayedlala i-high jump wanqobela elakuleli amagolide amabili kumaWorld Champs namasiliva kumaOlympic.