Isinxephezelo kubagibeli bezitimela eKZN
ABAGIBELI bezitimela KwaZulu-Natal bazonxezeshelwa ngokuthi kwelulwe isikhathi sokusebenza kwamathikithi abo ngesonto.
Imizila yezitimela kulesi sifundazwe isalokhu ivaliwe ngemuva kwezikhukhula zangoLwesibili kodwa abaphathi benkampani yezitimela bathi uma seyivuliwe, amathikithi azobe esedlulelwe yisikhathi azosetshenziswa.
Awenyanga nawesonto azokwengezelwa isikhathi ngelinye isonto. UNkk Isabel Westhuizen okhulumela iPrasa Metrorail KwaZulu-Natal uthe onjiniyela babo basabuyisela konke okugudluke ngesikhathi kunezikhukhula.
“Kuningi okonakele kojantshi, kwezinye izindawo bagudlukile kwezinye bagcwele imfucuza kukhona nezimoto eziguguleke kwezinye izindawo zaphonseka kojantshi.
Amabhuloho amanye awile nezinye iziteshi zikagesi zingenwe ngamanzi. Konke lokhu ngeke sikwazi ukukulungisa ngesikhathi esifushane. Siyakuqonda ukuthi kunabantu abahamba ngesitimela zonke izinsuku kodwa kudingeka ukuthi sibe nesiqiniseko sokuthi kuphephile ngaphambi kokuthi siyivule imizila. Abagibeli sizobazisa uma isimo sesilungisiwe,” kusho yena.
Uqhube wathi basabheka ukuthi kungenzeka yini ukuthi kuvulwe imizila ethile kuqala eminye ilandele. Okwamanje uthe akakazi ukuthi umonakalo owenzekile ungabiza malini ngoba kusacwaningwa.
Khona manjalo, elayizolo lishone esesebenza amachweba aKwaZulu-Natal emuva kokuvalwa ngoLwesibili nangoLwesithathu.
UNkk Shulami Qalinge oyisikhulu esiphezulu KwaTransnet Port Terminals uthe seliyasebenza ichweba laseThekwini.
Uthe ucwaningo lwabo luveze ukuthi sekuphephile ukusebenza kwemikhumbi futhi bazisusile nezinto ebeziphazamisa ukuhamba kwemikhumbi.
Inkampani ekhiqiza izimoto iToyota, eseProspecton, eThekwini ithi isahlola umonakalo emuva kokuphazamiseka kokusebenza ngoLwesibili, uLwesithathu nayizolo kwazise imvula ilimaze imishini nezimoto.