Igxeka awaphesheya ingwazi ngoKhune
UMQEQESHI wonozinti kwiBafana Bafana, u-Andre Arendse, owazakhela igama eqenjini lesizwe naphesheya kwezilwandle, ukhala ngamaqembu ase-Europe aziphuthisela ngekhono likanozinti weKaizer Chiefs u-Itumeleng Khune.
UKhune (30) uqale ukudlala esigabeni esikhulu ngo-2004. ENingizimu Afrika usezinqobe zonke izicoco ezimqoka. Usenqobe ezintathu ze-Absa Premiership, ezintathu zeMTN 8, ezimbii zeNedbank Cup nezine zeTelkom Knockout. KwiPremier Soccer League (PSL) useqokwe njengonozinti ovelele amahlandla amathathu, wahlabana ngowomdlali ovelele kanye kanti owomdlali ovelele oqokwe ngabanye abadlali usewuthole kabili. Ngo-2008 waqokwa njengeNewcomer of the Year emklomelweni wamaSouth African Awards kwathi ngo-2013 wadla ubhedu koweSportsman of the Year. Ngo-2007 waqokwa njengomdlali nonozinti ovelele kwiTelkom Knockout kwathi ngo-2013 waba ngumdlali ovelele kwiNedbank Cup.
KwiChiefs usehlabane ngomklomelo womdlali ovelele amahlandla amabili. Phezu kwalokhu uKhune usedlale kuyo yonke imiqhudelwano emikhulu egqoke ijezi leBafana. Udlale kabili kuCAF Africa Cup of Nations ngo-2008 eGhana nango-2013 eNingizimu Afrika, kwathi ngo2010 waba khona eqenjini lesizwe elidlale kwiNdebe yoMhlaba. Ngo-2009 uyibambe kwiFifa Confederation Cup.
Ngonyaka odlule ubeseqenjini elidlale kuma-Olympic Games eRio de Janeiro, eBrazil. U-Arendse, odlale imidlalo ewu-67 kwiBafana waphinde wayibamba kwiFulham nakwi-Oxford United okungamaqembu ase-England, uthe amaqembu aphesheya ayaziphuthisela kuKhune.
“U-Itu weneme kwiChiefs futhi naye uyiphethe kahle. Noma kunjalo kodwa ngikholwa wukuthi amaqembu ase-Europe kumele azisole ngoba ayaziphuthisela ngekhono lalo mdlali. Unakho konke okungenza ukuthi adlale khona kodwa amaqembu aphesheya yiwona alahlekelwayo hhayi u-Itu,” kusho u-Arendse.
UKhune usedlale imidlalo ewu84 kwiBafana. Njengamanje uhlezi endaweni yesithathu kubadlali beBafana asebedlale imidlalo eminingi.
“Angifuni ukuthi kukhona igebe phakathi kukaKhune nabanye onozinti. U-Itu unamava ebholeni lomhlaba futhi uyisethenjwa sezwe emidlalweni yomhlaba. Yingakho elapha ekhona futhi enza kahle,” kusho u-Arendse.
UKhune akakaze adlale kwelinye iqembu ngaphandle kweChiefs.