Ngabe umashelwe uJesu ngezikhukhula ukube ulapha
SENGIYABONA manje ukuthi kungani uNkulunkulu engafunanga ukuthi iNdodana yakhe uJesu ihlale nathi emhlabeni isikhathi eside, uSomasumasu wabona ukuthi nathi siyogcina siyibeke isandla njengamaJuda ayibethela.
Kwayena uJesu akanqabanga uma sekufike isikhathi sokuthi ayozihlalela noYise ngoba wabona kusekude ukuthi lo mhlaba uyahlaba. Ukube lezi zikhukhula ebezihlasele eThekwini zihlasele kusekhona uJesu ngabe sikhuluma ukuthi kuvalwe imigwaqo kumashelwa ukuthi uthule wathini ebona inkanyamba ifuna ukusibulala emini.
MaSolezwe kufanele silikhulume iqiniso lokuthi leziya zikhukhula zazinzima ngendlela yokuthi nomuntu ongakholwa wawumuzwa esememeza ethi: “Nkosi engcwele yehlisa ulaka lwakho, ungasishayi ngemfe iphindiwe njengoba wenza emandulo ubhubhisa umhlaba ngamanzi. Somandla thina asenqabanga ukugibela emkhunjiini kaNowa, wukuthi akukho isimemezelo esaphuma esisazisa ngokuthi umhlaba uzophinde uwubhubhise ngozamcolo”. Kuyahlekwa noma kufiwe ngoba nangosuku lwaleso siphepho ngaze ngahleka ngizwa omunye ememeza ethi: “Baba kaDuduzane kungabe ukuphi njengoba sihlaselwe yinkanyamba ebheme iwunga. Uma ubhizi sicela uthumele amaGupta azositakula ngamabhanoyi anophephela emhlane ngoba iTheku lisijikele sesifuna ukuyocasha eDubai.”
Lezi zikhukhula bezixakile ngoba no-Ayanda Msweli woKhozi FM omemezela isiminyaminya uzwakale ekhala ethi: “Tshatha noSelby kuyimanje nami ngisavaleleke eSiphingo, akuhambeki izimoto zethu zibhukuda emanzini njengemikhumbi.” Inkulumo kaMsweli ifakazelwe ucingo oluvele kuQaps enginxusa ethi angiphuthume ngizomtakula ngoba ubhajwe ngeveni ulayishe imbuzi abe yoyithenga eSiphingo. UQaps ngimphendule ngenhlonipho ngathi ngiyaxolisa angikwazi ukuyomsiza eSiphingo ngoba sengizwile ukuthi inkanyamba igqoke ithayithi ishaya ivuvuzela.
Bakwethu ngiyazi ukuthi amaphara awathandeki kodwa uVolos ufisa ukusho ukuthi yena usizwe yiphara elimxwayise ngokuthi angasondeli ngasebhishi ngoba kunezikhukhula. Ngalawo mazwi ngithi angibonge esizweni samaphara, ngithi awaqhubeke nokuba yizinhloli zesimo sezulu. NgokukaVolos kungcono ukulalela amaphara kunokulalela ababikezeli besimo sezulu ngoba bahluleka ukusiqwashisa ngokuthi kuzohlasela isivunguvungu esicishe sabhubhisa abantu. Lezi zangoma zezulu angisazethembi ngoba ziyaqagela ngokuthi zikhulume into eyodwa ethi izulu lizokwemboza ngamafu lithele nezihlanjana zemvula. Uma izulu selithela uzamcolo ohambisana nezikhukhula bajike baqambe amanye amanga bathi kube nokushayisana kwamafu okuholele ezimvuleni ezinkulu.
MaSolezwe ngicela nimkholwe uVolos uma ethi yena lezi zikhukhula zamfica esehlezi esitolo esigudle ulwandle esidayisa izitshulu. Sathi sisahlezi sixoxa sabona ngamanzi esegcwele ngaphakathi, kwaba wubumayemaye sesintanta emanzini sajika sagibela emafrijini. Kuthe kusenjalo sabona ushaka omhlophe ungena esitolo utshuza uhalazela kucaca ukuthi awuboni ukuthi usuphumile olwandle. Ngebhadi lami ushaka wavele waqonda mina wangiluma iqhezu lezinqa kodwa ngawubona uhlina kucaca kuthi awujabulanga ngenyama yami. Ngathi ngisadidekile ukuthi ngabe yini lena ehlinisa ushaka ngaphinda ngakhumbula ukuthi ngiwumuntu othanda ukudla upelepele. Okusho ukuthi ushaka uthe uyaphapha uhlafuna inyama yami wathola ukuthi iyababa ayigwinyeki.
Ngokomthetho kufanele ngabe lezi zikhukhula ziwabulale wonke amagundane amakhulu ahlala ezitamkokweni zeTheku kodwa awafanga kunalokho ajike abhukuda ongathi ofishi. Kunamanye abekhukuda uwabone ukuthi asekhathele kodwa kuqhamuke amanye angofeleba awodonse awakhiphele endaweni ephephile. Lezi zikhukhula zisifundise ukuthi amagundane ahlala ezitamkokweni ahlukene, kukhona nawuphiko lokutakula uma kunezinhlekele. Okungezeka ukuthi njengoba amagundane ahlala ezitamkokweni engafi kalula kukhona alapha amanye uma egula.