Uzithintele owakaShembe kumaKhatholika
BAYAVEVA abebandla lamaRoma aKhatholika ngentshumayelo yomfundisi wamaNazaretha ayethule kuKhozi FM ngoMgqibelo, abathi ibigxeka inkolo yabo.
Le ntshumayelo eyenziwe nguMfundisi Mthembeni Mpanza weNazarites Church of God oshumayela ngoMgqibelo kulo msakazo, ohlelweni uShembe nobuNazaretha, igxekwe nanguFata Smilo Mngadi. Kuthiwa uMfundisi Mpanza ugxeke leli bandla “ngokukhonza” uMariya. UFata Mngadi ubhale ekhasini lakhe leFacebook wafaka noMphathisiteshi woKhozi FM uMnuz Bonga Mpanza, ezwakalisa ukungenami ngale ntshumayelo. UFata Mngadi uthe akakhulumeli ibandla kodwa uthintekile ngoba uyayazi imigomo yokushumayela emsakazweni. Uthe namanye amakholwa aweneme.
“Nami nginayo ilayisensi yokushumayela emsakazweni futhi siyatshelwa ukuthi akumele sigxeke amanye amabandla. Isikhathi esisetshenziswe nguMfundisi Mpanza esokushumayela hhayi inkulumo mpikiswano. Awukwazi ukukhuluma ngezinto zabanye abantu bengekho. Ugxeke uMariya nokukhonzwa kwakhe, obekungamele akhulume ngaye ngoba akuyena owakwaShembe,” kusho uFata Mngadi.
Uthi kwayena uma eshumayela akazithinti izinkolo zabantu ngoba umsebenzi wakhe ukuguqula imiphefumulo.
“Ukhozi wumsakazo womphakathi futhi akumele aqhakambise inkolo yakhe ngesikhathi sikahulumeni. Akaqali uMpanza ukusebenzisa umsakazo ukugxeka nokuqhakambisa isonto lakhe kodwa okwangoMgqibelo bekudlulele. Ngazi ukuthi intshumayelo kumele ilalelwe ukuthi ayiphambuki yini ngaphambi kokufakwa emsakazweni,” kusho yena.
UFata Mngadi uthe ufake nomphathi-siteshi esikhalweni sakhe kuFacebook ukuze lolu daba lufike kubaphathi bomsakazo. Uthe uzame ukuthola i-email yomunye wabaphathi boKhozi kwi-website wangayithola eqondile, wagcina ebhale kulena ayitholile.
Kuthintwa uMfundisi Mpanza uthe akaziboni ephambukile entshumayelweni. Uthe ubengagxeki ibandla kodwa ubehlaziya iBhayibheli.
“Emsakazweni kunemithetho esibekelwe yona engingaboni ukuthi ngiyiphulile. Bengihlaziya iBhayibheli kusuka kwiTestamente elidala kuya kwelisha. Ngikhulume ngoMariya ngoba ukhona eBhayibhelini futhi bengiveza umsuka wokukhonzwa kwakhe okwavela kwabaseRoma. Bengikhuluma ngabaseRoma hhayi ibandla,” kusho uMpanza.
UMfundisi Mpanza ugcizelele ukuthi ubeveza umlando nokuthi iTestamente elisha lizishintshe kanjani izinkolelo zabantu.
“Ngize ngakhuluma ngokuthi abaseRoma babulala amaKristu ayengasenzi ngendlela ababewafundise ngayo. Nalapho bengisho abaseRoma ngokomlando weBhayibheli hhayi ibandla.”
Inombolo yomphathi woKhozi ibingazamukeli izingcingo izolo. Okhulumela iSABC uMnuz Kaizer Kganyago akalubambanga ucingo, uthunyelwe iSMS okushaye isikhathi sokuloba engayiphendulanga.