Kuboshwe usomatekisi ngokufa komshayeli

UBOSHIWE usomatekisi (41) wasePhoenix osolwa ngodubula umshayeli wakhe wafa emuva kokubanga iholo.

Kuthiwa umshayeli, uMnuz Siyabonga Gcabashe (30), waKwaMashu, udutshulwe wumnikazi wetekisi abeyishayela ngoLwesihlanu ebusuku ngaphambi kwehora lesishiyagalombili bebanga ukuthi ubefuna iholo lakhe. Kukholakala ukuthi kusuke ingxabano usomatekisi wase edubula uGcabashe esiphundu, wafela khona lapho.

Okhulumela amaphoyisa KwaZulu-Natal, uCol Thembeka Mbhele, ukuqinisekisile ukuthi umnikazi wetekisi uboshiwe.

“Umsolwa uboshwe ngalo usuku lwesehlo. Kulindeleke ukuthi avele enkantolo maduzane ngecala lokubulala,” kusho uCol Mbhele.

UMnuz Prem Balram, okhulumela uphiko lweReaction Unit South Africa, uthe babizelwe endaweni yesigameko emuva kokuzwakala kokuqhuma kwesibhamu.

“Ngesikhathi sifika sifice umgilwa elele phansi opha kakhulu. Sithole ukuthi unenxeba lokudutshulwa ekhanda. Abezimo eziphuthumayo bakuqinisekise emuva kwesikhashana nje befikile ukuthi umgilwa useshonile,” kusho uBalram.

Uveze ukuthi kuqale kwanezinsolo zokuthi umshayeli weToyota Quantum ubehlehlisa imoto epaka, washayisa udonga. Umnikazi wemoto wathi uma emthethisa ngokushayela budedengu kwasuka ingxabano. Kuthiwa umshayeli ube eselanda isibhamu emotweni wadubula emoyeni. Kuthiwa umqashi wakhe uzame ukumphuca isibhamu, saqhuma samdubula ekhanda.

UBalram uthe kubuye kwavela ukuthi kube nengxabano, usomatekisi wakhipha isibhamu sakhe wadubula umsebenzi wakhe. Endaweni yesehlakalo kutholakale isibhamu i-9mm.