Bafuna ukubhala u-matric ngenkani
BAPHIHLIZE isikole bantshontsha nesisefo semali abafundi baseBonginhlanhla High, eNtumbane, oPhongolo, abafuna ukubhala ngenkani zonke izifundo zakwa-matric bebe babekade beduduliwe ngoba befeyilile.
Othisha kuthiwa baphume ngesamagundane abafundi besho ukungqongqisa amahhovisi abo ngemuva kokuphihliza wonke amawindi emakilasini ngeledlule.
Abafundi baqala ukubhala u-matric nge-English kusasa.
Kwesinye sesikole esisendaweni, iMtshekula High, nakhona kuthiwa kwasuka izibhelu abafundi bacekela phansi amadeski nakhona kusoleka isizathu esifanayo naseBonginhlanhla.
Ikhansela lakuwadi 6, uMnuz Petros Mavuso, lithe kucekelwe phansi yonke into eBonginhlanhla lathi mkhulu umonakalo odalekile.
UMavuso uthe umsindo ususwe wukuthi abafundi bebefuna ukubhala zonke izifundo kodwa babekade betsheliwe ukuthi bazobhala ezimbalwa.
“Sibe nomhlangano nabazali ngoLwesihlanu savumelana ukuthi kuqale ukufunda namhlanje. Sizobe sikhona siqaphe isimo kulezi zikole nokuthi kuyafundwa yini. Sivumelene nabazali ukuthi bakhokhe u-R50 ingane ngayinye ukuze kulungiswe umonakalo ongaphezulu kuka-R17 000 wokulungisa amawindi,” kusho uMavuso.
Kunohlelo lomnyango lokududula abafundi abasuke befeyile uGrade 11 baye kwamatric ngoba kungavumelekile ukuthi umfundi afeyile leli banga izikhawu eziningi.
Kwa-matric kuba nesivumelwano sokuthi uma kungukuthi imiphumela yakhe yangoMashi, Juni nangoSepthemba ayithuthuki uzobhala izifundo ezimbalwa, ezinye azibhale ngonyaka ozayo okwaziwa nge-modularization. UMavuso uthe eMtshekula abafundi bakwaGrade 10 baqale umbhikisho ngesikhathi abafundi baka-matric behlangane nothisha kanye nabazali ukudingida izinto ezithinta ukubhalwa kuka-matric. Uthe emhlanganweni abafundi bathe bafuna kuhambe uthishanhloko nonogada kodwa bangazibeka izizathu. “Baphinde bathi bafuna ukugunda izitayela emakhanda. Nakhona kucekelwe impahla yesikole, kwabizwa amaphoyisa kodwa bawashaya ngamatshe,” kusho uMavuso. UMnuz Allen Thompson, iPhini likaMengameli weNatu, uthe amalungu abo aphume ngesamagundane ehlaselwa ngabafundi.
Uthe abafundi abaluqondi kahle lolu hlelo wathi baluchitha umnyango usaluhlongoza.
“Luyababambezela abafundi, lubazwisa ubuhlungu ngoba abakwazi ukushintsha babhale zonke izifundo uma bezibona ukuthi bazokwazi ukuphasa u-matric. Ngabe kungcono ukuthi umfundi uphinda uGrade 11 kunokuthi anambithisiswe uGrade 12 ngoba usuke efana nomuntu ongawenzi lowo Grade 12. Ingane efunda u-matric ayivunyelwe ibhale zonke izifundo,” kusho uThompson.
Okhulumela umnyango wezemfundo, uMnuz Sihle Mlotshwa, uthe bayazi ngalezi zehlakalo wathi abafundi bazobhala izifundo ezimbalwa njengokwesivumelano.
Okhulumela amaphoyisa, uColonel Thembeka Mbhele, uthe abafundi bantshontshe imali, amalaptop base becekela phansi isikole kodwa imali iphinde yatholakala ngemuva kophenyo.
“Amaphoyisa asiqaphile isimo endaweni.”