Isidumbu sowesifazane esingenakhanda
KUTHOLAKALE isidumbu sowesifazane singenakhanda kwaNjobokazi, eHammarsdale okukholakala ukuthi kungenzeka ukuthi kuhlobene nekhanda lowesifazane elisanda kutholakala kuyona leya ndawo.
Isidumbu sowesifazane, ongakaziwa ukuthi ungubani, kuthiwa sitholakale ngoLwesihlanu ebusuku sesiqala ukonakala.
Kwenzeka lokhu nje emasontweni amabili adlule Isolezwe libike ngokutholakala kwekhanda lomuntu wesifazane kuleya ndawo.
Umthombo okhulume naleli phephandaba uthe isidumbu sitholakale ebusuku eduze kwesitolo sakwaShabalala nokungekude nalapho okwatholakala khona ikhanda.
“La sitholakale khona isidumbu akukude nasesitolo sakwaShabalala. Akukhona kodwa la okwatholakala khona ikhanda kodwa indawo eseduzane ngoba uyakwazi ukuyibona uma ulapho okwakunekhanda khona. Kusolakala ukuthi kungenzeka ukuthi isidumbu esaleli khanda elatholakala,” kusho umthombo.
Ukutholakala kwekhanda kwashiya umphakathi ushaqekile njengoba abantu babesadidekile bezibuza ukuthi ngabe yikhanda lomuntu wesifazane obulawe kwenye indawo kodwa ikhanda lakhe lalahlwa kwaNjobokazi yini. Ngesikhathi kutholakala isidumbu kube nabacabanga ukuthi ngesekhanda elitholakele. Okhulumela amaphoyisa KwaZulu-Natal, uCol Thembeka Mbhele ukuqinisekisile ukuthi amaphoyisa ayaphenya ngokutholakala kwesidumbu.
Uthe ngeke bakuqinisekise ukuthi isidumbu ngesekhanda elisanda kutholaka ngoba lokho kusazophenywa.
“Sinxusa amalungu omphakathi alahlekelwe amalungu omndeni ukuthi avele ukuze ahlolwe ngenhloso yokuthi kutholakale ukuthi ikhanda nesidumbu ngokukabani. Amalungu omphakathi angaya esiteshini samaphoyisa eHammarsdale acele ukukhuluma nophethe isiteshi,” kusho uColonel Mbhele.