Usole ingqungquthela yesifunda ngababulawa
I-ANC KwaZulu-Natal ithi kwasiza ukukhishwa komyalelo wokuthi kungabe kusahlala zingqungquthela zezifundazwe noma zezifunda ukuze ikwazi ukubhekana nezinkinga ezikhungethe iHarry Gwala.
UNobhala we-ANC esifundazweni, uMnuz Super Zuma ethula ubufakazi kwikhomishini kaMoerane ephenya ngokubulawa kosopolitiki, uthe abantu babulawa ngenxa yokuthi bese kusondele ingqungquthela yesifunda.
UZuma uthe le ngqungquthela bekumele ibe kule nyanga kodwa yahlehliswa.
“Isigungu sikazwelonke sakhipha umyalelo wokuthi kungabe kusaba nezingqunquthela njengoba silungiselela ekazwelonke ngoDisemba.
Lokhu kusinike isikhathi sokuthi sibhekane nesimo salesi sifunda. Isigungu sikazwelonke sanquma ukuthi izingqungquthela kumele zize zibe ngonyaka ozayo,” kusho uZuma.
Uthe kulesi sifunda kunenkinga yokuthi kunamaqembu amabili angasathembani.
“Njengoba kubhekwe kule ngqungquthela kuba khona abasuke beseka uhlangothi oluthile nabeseka olunye. Sizoyilungisa nendaba yamakhansela amabili aseMzimkhulu, adutshulwa enoMagaqa (Sindiso) endabeni ethinta ezokuphepha,” kusho uZuma.
Lawa makhansela uNkk Jabulile Msiya noNksz Nontsikelelo Mafa akhala kule khomishini ngokuthi afuna ukutholelwa onogada ngoba awaphephile.
Akhala ngokuthi asasongelwa njengoba ayesohlwini lwabantu abazobulawa.
UZuma uthe akuwona kuphela amalungu eSACP abulawa eNtshangwe kodwa nawe-ANC abulawa.
Isimo sike sashuba kule ndawo nyakenye njengoba kwakubhekwe okhethweni lohulumeni basekhaya phakathi kwe-ANC neSACP.
UZuma uthe mathathu amalungu e-ANC abulawa kule ndawo okubalwa nelesigungu segatsha aweSACP mabili.