I-SABC inikele kwabemvula
BASULWE izinyembezi ngamaphasela okudla abantu baseMlaza nabaseMalukazi abakhahlenyezwa yimvula enamandla eyayina emasontweni amabili edlule eThekwini.
Umonakalo omkhulu wale mvula wenzeka ezindaweni eziseningizimu yeTheku njengakhona eMlaza, eMalukazi naseManzimtoti.
NgoMgqibelo iSABC Foundation inikelele imindeni engu-600 eyalinyalelwa yizimpahla zayo Eyadini Lounge, eMlaza.
Okhulumela iSABC KwaZulu-Natal, uNksz Lesego Kgwebane, uthe baqale ngokuya eMlaza naseMalukazi behlola umonakalo.
“Imindeni esibone ukuthi ilinyalelwe kakhulu yiyo esiyibhalise amagama ukuze ibe sohlwini lwezohlomula. Sisebenzisane nesikhungo somphakathi iMalukazi Outreach Centre ukuthi sisisize ukuze sithole eminye imindeni,” kusho uLesego.
Uthe babe sebenxusa umphakathi nosomabhizinisi ukuthi baphonse esivivaneni ngokunikela nanoma ngabe yini engaba wusizo.
Kukhona abanikele ngezimpahla zokugqoka, amavoucher okuthenga ukudla nokunye.
“Sisebenzisane noMjey (Zama, umnikazi waseYadini) ukuthi asixhase ngokunye waphinde wasivumela nokuthi sisebenzise indawo yakhe ngoba inkulu. Sibonile ukuthi usevele ulungisa imigwaqo elimale emvuleni sabe sesithi asibambisane naye,” kusho uLesego.
ULesego uthe akupheleli Eyadini kodwa uyanxusa ukuthi nabanye osomabhizinisi bavule izandla ukuze basebenzisane nabo ukuthuthukisa umphakathi.
Imindeni ebizohlomula ilandwe emakhaya ngebhasi.
UMjey uthe yize bengenayo imali Eyadini kodwa bakubone kufanele ukuthi bafake isandla ekusizeni umphakathi.
UKhozi FM belusakaza bukhoma uhlelo lukamaskandi iSgiya Ngengoma. Bekukhona uNkosinathi Mshengu uBheka Mchunu esele estudiyo.
Uhlelo lokunikela beluphethwe nguSbu Buthelezi owethula iNdiza Nathi ngo-12 kuya ku-3 ntambama phakathi nesonto kuKhozi.
Bekukhona nomphathi woKhozi uBonga Mpanza.
Ngemuva kokunikela kube sekuqala umcimbi we-jazz obekunandisa kuwo Umkhumbane Jazz Ensemble, Bongani Nkwanyana neTutti Groove.