Uchithe imibiko kwethulwa eqanjwe ngoPixley Seme

UNDUNANKULU waKwaZuluNatal, uMnuz Willies Mchunu, ukhahlele imibiko yokuthi i-ANC ihlongoza ukuvalela ngaphandle amaNdiya ekuhlomuleni kwezomnotho.

UMchunu ukusho lokhu kwethulwa iDr Pixley Ka-Isaka Seme Foundation eNkosi Albert Luthuli ICC, eThekwini ngoMgqibelo. Uthe ukhathazekile ngemibiko esabalele kwabezindaba wathi abayifafazayo bafuna ukubanyundela.

“I-ANC ayikaze ithi izovalela amaNdiya amathuba okuhlomula. Esikushoyo wukuthi sizobeka phambili abamnyama ababencishwe amathuba phambilini,” kusho uMchunu.

Uthe bayahambisana nombono kaDkt Seme owayelwela ukuthi abamnyama bangavalelwa emathubeni okuhlomula kuhulumeni. Kulo mcimbi bekukhona inkosi uMangosuthu Buthelezi echaze ngobudlelwano bayo noDkt Seme. Uthe yize etshelwe ngalo mcimbi esenezinye izinhlelo kodwa ubengeke angabi khona.

“Ubuholi bukaDkt Seme bangihlaba umxhwele ngaze ngajoyina i-ANC Youth League e-University of Fort Hare ngo-1949. Ngajoyina ngoba ngihlonipha inhlangano ayeyisungulile umalume. Wayengeyena nje umuntu engangizwe ngaye kodwa wayeyingxenye yomndeni wami,” kusho uButhelezi.

Ethula inhlangano uNksz Pearl Bhengu weDr Pixley Ka-Isaka Seme Foundation ubonge ukubambisana nomndeni wakwaSeme obumelwe wumzukulu wakhe uMnuz Vezindaba Seme noNksz Helen Seme osesele ezinganeni.

UNksz Bhengu uthe kuningi okusezinhlelweni ezizohambisana nokusungulwa kwenhlangano. Kukona ubale ukusungulwa kwekolishi labafana elizoqanjwa ngoDkt Seme.

“Sihlele ukwethula inhlangano ngo-Okthoba okuyinyanga azalwa ngayo. Sizoba nezinhlelo zokubukisa ngemfashini, izinkondlo nokufunda ngaphansi kwe-Africa We Are One Festival,” kusho uNksz Bhengu.