I-Shoprite ihlawulisiwe emuva kokwephula umthetho weNCR
EZABATHENGI
SEKUKANINGI ngithola izingcingo nama-email kubafundi bengibuza ukuthi batholakalaphi abeluleki bezikweleti (debt counselors) abawenza kahle umsebenzi.
Iqiniso wukuthi nami angizazi izinkampani eziwenza kahle umsebenzi wokusiza abacwile ezikweletini.
Phela ziningi izinkampani eziheha abacwile ezikweletini ngokuthi zizobanciphisela izindleko.
Ngaphambi kokuqoka inkampani ofuna ikululeke ngezikweletu kubalulekile ukuthi uye kwi-website yeNational Credit Regulator (NCR) ubheke uhla lwezinkampani eziluleka ngokwezikweleti.
Banohlu lwezinkampani ezisemthethweni ezenza lo msebenzi futhi okuzothi uma zingawenzanga umsebenzi ezikuthembise wona ukwazi ukuthola ubulungiswa kwiNCR.
INational Credit Regulator ayesabi muntu futhi umsebenzi wayo wukuvikela abathengi. Yingakho isikhulu esiphezulu seNational Consumer Tribunal uNkk Nomsa Motshegare ehlawulise iShoprite u-R1 million emuva kophenyo lweminyaka oluveze ukuthi le nkampani yephule umthetho wokukhipha isikweleti iNational Credit Act.
UNkk Motshegare uthe bathole ukuthi iShoprite inecala lokubolekisa ngemali budedengu.
“Uphenyo lweNCR luthole ukuthi le nkampani yenza izivumelwano namakhasimende ngaphandle kokwenza isiqiniseko sokuthi azokwazi ukukhokha imali ayibolekile,” kusho uNkk Motshegare.
Uthe baphinde bathola uShoprite unecala lokuphula iNational Credit Act ngoba awusenzi isiqiniseko sokuthi oboleke ushade nomuntu ohola malini.
Engosini edlule sithole isikhalo kuNksz Sizakele Masango owathenga osofa kwaBradlows eBridge City. Osofa bakhe babanenkinga wase ecela ukuthi bakhandwe. UNksz Masango wayethenge osofa ngo-2014, inkinga yaqala ngasekupheleni kuka-2015. Osofa bakhe bayiswe efemini ezobakhanda ngoMashi wonyaka odlule babuya sebenenye inkinga.
Uyibikile nayo baphinde bathathwa kwaze kwaphela unyaka bengabuyanga.
Kulo nyaka osofa bakhe babuyiswe sebehlotshiswe ngendlela engafani neyalaba akade esele nabo.
Kuthe uma ekhala ngalokhu watshelwa ukuthi uma engabathathi bazodayiswa. UNksz Masango ulubikile udaba lwakhe kwiNational Consumer Commission eThekwini waphinde waqasha nommeli kodwa abakwaBradlows bebelokhu bemshonisa le nale.
Uthinte Ezabathengi zona ezithinte abakwaBradlows.
AbakwaBradlows bathinte uNksz Masango bacela ukumhlobisela osofa bakhe ngendlela efanayo.
UNksz Masango uthe ucela ukunikwa uhhafu wemali ayethenge ngayo osofa ngenxa yokuhlukumezeka.
Ngesonto eledlule uthumelele incwadi yasenkantolo eyalela abakwaBradlows ukuthi bamnxephezele.
Sizoqhubeka nokulandela udaba lwakhe.
Ezabathengi ziphinde zavakashelwa nguMnuz Ndlovu ocele ukungadalulwa igama ngenxa yokuthi wayethathe i-credit card kwelinye lamabhange.
UNdlovu ukhala ngokuthi isikweletu asehli yize ekhokha nyanga zonke, useze wadlulisela udaba lwakhe kwabeluleka ngezikweleti.
Ezabathengi zithinte ibhange likaNdlovu zathola ukuthi yize uNdlovu ekhala lwezabathengi akakaze avule icala ebhange.
Abasebhange bacele ukunikwa isikhathi ukuze baphenye.
Ezabathengi zithanda ukweluleka abantu ukuthi uma benezikhalo emabhange nasezitolo, baqale bafake isikhalo kuleyo ndawo.
Uma sebefake isikhalo bacele inombolo yecala evamise ukubizwa ngereference number.
Kuyasiza ukuvula icala lapho uhlukumezeke khona nokuba nenombolo yalo ngoba uma sekuphenywa ukuthi wabika kuyashesha ukuvela ukuthi kungani wanikwa i-reference number kodwa wagcina ungasizakalanga.
Sithole imibuzo nangemishwalense yezimoto emuva kwemvula eshiye kukhalwa eThekwini namaphethelo.
UNkk Simangele Shozi waKwaNdengezi ushayele Ezabathengi ucingo ekhala ngokuthi umshwalense wakhe awufuni ukumlungiselela imoto elimale u-bumper.
Okukhalisa uNkk Shozi wukuthi izindleko zokulungisa imoto yakhe zingu-R1000 kodwa umshwalense uthi makakhokhe i-excess ka-R3000.
Ezabathengi zithinte inkampani yomshwalense zathola ukuthi uNkk Shozi ucelwe ukuthi azilungisele imoto ngenxa yokuthi uma ecela isinxephezelo uzokhokha i-excess ka-R3000.
I-excess yimali ekhokhwa ngabanikazi bomshwalense uma becela isinxephezelo emuva kwengozi noma isigameko esithile.
Ngebhadi Ezabathengi azikwazi ukulwela uNkk Shozi ukuthi akhandelwe imoto ngaphandle kokukhokha i-excess.
Ezabathengi zimeluleke ngokuthi azikhandele imoto kunokuthi akhokhe i-excess.
Okwenza Ezabathengi zingakwazi ukumlwela wukuthi wasayina isivumelwano ezibophezela ukuthi uzokhokha i-excess njalo uma efaka isicelo sokunxeshezelwa.