Asibadingi abafundi abazogcwaneka ezikoleni zethu
KUYAPHOXA okuthiwa kwenziwe ngabafundi baka-matric base-East Wood Secondary, eMgungundlovu. Abafundi abangu-18, asebenecala lokususa udlame, basolwa ngokuvuka umbhejazane bahlasela othisha babajikijela ngamaqanda nangamakhondomu anodoti bababhunyela nangomchamo.
Kuthiwa kulimale nezimoto zabanye othisha kulesi sehlakalo.
Okunzima kakhulu laba bafundi ababhekene nako wukuthi bangase bangazibhali izivivinyo zika-matric njengoba kusasa kubhalwa iphepha le-English elibhalwa yibo bonke abafundi.
Namhlanje bazovela enkantolo lapho kulindeleke ukuthi kucace ngokuthi bayanikwa yini ibheyili noma cha.
Isinqumo senkantolo ngebheyili yiso esizocacisa ngekusasa labafundi njengoba uMnyango wezeMfundo KwaZulu-Natal uzihlangulile ngoba leli cala selisezandleni zabomthetho.
Mhlawumbe abafundi baqale indelelo yabo sakudlala yagcina seyokheleka yaba yileli hlazo esibike ngalo ngeledlule.
Ukufakwa kwabo esitokisini kumele kube yisifundo esizobashayisa ngovalo nabafundi abalandelayo baka-matric njengoba kuthiwa wandile umkhuba wokuthi abafundi abenza leli banga bajikele othisha babadelele uma sebezobhala noma sekubhalwa izivivinyo ngoba bethembe ukuthi ngeke kusaba lula ukubaxosha esikoleni.
Lo mkhuba siyawugxeka impela ngoba ave kuphulwa umthetho wesikole nje kuphela kepha uhambisana nendelelo etshengisa ukungamhloniphi omunye umuntu.
Umfundi ngumuntu okusuke kusalindeleke ukuthi ahloniphe, athobeke, alalele futhi azimisele esikoleni uma efuna ukuba nekusasa eliqhakazile.
Lizoqhakaza kanjani ikusasa lomfundi othela uthisha ngekhondomu enodoti ambhunyele nangomchamo?
Bazali, ake uqine umthetho emakhaya. Imbewu yenhlonipho nesimilo mayitshalwe ingene ijule enganeni ukuze ingaphumi ekhaya iyokuphoxa idelele nabanye abantu.
Abafundi mabakhumbule ukuthi bangabafundi nokuthi othisha bangothisha, kuhlonishwane.