UNzimande bekumele ngabe kade asula esikhundleni abe kuso
MHLELI: Bangakhuluma nje abantu ngoba phela bathanda ukukhuluma, uDkt BladeNzimande kufuze ukuba kudala asula kwiKhabhinethi kaMsholozi. Lokho ngikusho ngoba kudala aqala ukukhombisa ukuthi akasamufuni. Yonke indawo lapho eyisikhulumi khona uNzimande belingasali igama likaZuma elihambisana nezinhlamba ezimangalisayo.
Ngicabanga nokuthi noma yini abeyenza ubecabanga ukuchitha uMengameli, ayikho enye into ayicabangayo.
Yena noPravin Gordhan ngabe bayasula nje ePhalamende noma bacele isikhala kwiDA noma kwi-EFF ngoba vele basebenza umsebenzi weqembu eliphikisayo. Bekufuneka kuthiwe kuze kuthiwe uZuma umxoshile yingakho ebeselokhu eqhomolozile kwesika ngqongqoshe engasuli azi kahle ukuthi ayisekho into ayihlalele.
Umuntu uma engasamthandi umholi weqembu akulo uyashiya aye kwelinye noma azisungulele elakhe, hhayi ukuvula umlomo agxeke asho izinhlamba ngomholi angamthandi. Hhayi bo ayisekho yini into engakhulunywa ngaphandle kukaZuma? Noma sekukhankaswa kukhankaswa ngoZuma, abakwaGupta, inkohlakalo, Nkandla, imibiko eqoshiwe ezobunhloli nokwehla komnotho.
Bakwethu thina asisaqondi nhlobo ukuthi kanti lo Zuma wadlani kabani? Wayidla ngaphambi kokuthi akhethwe noma esekhethiwe nalapho esephuma esikhundleni? Yena yedwa amacala angu-18? Kepha akagwetshwa nayelilodwa. Kazi wenzani kubani weMhlanganyelwa Msholozi? Mhlawumbe komele ulishintshe leli gama hleze linomthelela CS Madela OLUNDI