Isibheke kowamanqamu iCell C Sharks
UROBERT du Preez ocija iCell C Sharks uthe ngeke ashintshe lutho eqenjini lakhe elizobhekana neWestern Province emdlalweni wamanqamu weCurrie Cup eGrowthpoint Kings Park, ngoMgqibelo ngo-4 ntambama.
ISharks izibekisele indawo kowamanqamu ngokushaya iBlue Bulls ngo 37-27 khona eKings Park ngoMgqibelo. Iqembu lasekhaya lisheshe lakhombisa ukuthi alinaso isikhathi sokusinisa amahleza ngokushaya ama-try amabili asheshayo umdlalo usaqala. Lokhu kwenze kwaba yilona ebelilokhu lizihola phambili kwaze kwaphela umdlalo.
UDu Preez uthe umdlalo wefayineli kumele bawudlale sengathi bayaqala ukuyibamba kwiCurrie Cup ngempelasonto.
“Ngiyazi ukuthi iningi labadlali esinabo alikaze lidlale kowamanqamu. Nokho angihlelile ukushintsha izinto eziningi kodwa sizobona uma sesizilungiselela phakathi nesonto,” kusho uDu Preez.
“Kona zikhona izindawo ezincane okumele sizilungise kodwa ngijabule ngendlela abadlale ngayo abadlali bami. Sibanikeze amaphenathi amaningi ikakhulukazi ngesiwombe sesibili ngakho kumele sikulungise lokho.”
USbusiso Nkosi uphume esegodle ingalo kulo mdlalo kodwa uDu Preez uthe uzohlolwa kahle ukuthi ulimale kangakanani.
“Ngicabanga ukuthi ugudluke indololwane. Uphuthunyiswe esibhedlela kodwa sizozwa ukuthi alikho yini ithambo elichachambile uma esehlolwe odokotela,” kusho uDu Preez.
UNkosi udlale kahle kakhulu kwiCurrie Cup eshayela iSharks ama-try abalulekile ngakho kungabe iSharks ishayekile uma engangadlala kowamanqamu.
Lo mqeqeshi uyincome kakhulu eyokuthi bebevunyelwe ukusebenzisa abadlali abangu-23 kulo mdlalo owandulela owamanqamu, hhayi abangu-22 kuphela.
“Kufanele kuhlale kunjalo kuyo yonke imidlalo yeCurrie Cup,” kusho uDu Preez.
Uphethe ngokuthi kuzoba yinto enhle kakhulu ukudlalela owamanqamu ekhaya ngoMgqibelo kodwa lokho akusho ukuthi kumele bazithele ngabandayo. I-Province abazobhekana nayo isike yayishaya iSharks emdlalweni wokugcina wamaphuzu emasontweni edlule khona eKings Park. Abaqobele amaphuzu: Cell C Sharks – ama-try: Lukhanyo Am, Kobus van Wyk, Louis Schreuder, Ruan Botha. Amaconversion: Curwin Bosch (4). Amaphenathi: Bosch (2). i-Drop goal: Bosch.
Vodacom Bulls - ama-try: Pierre Schoeman, Ivan van Zyl, Burger Odendaal. Ama-conversion: Marnitz Boshoff (3). Amaphenathi: Boshoff (2).