UDa Gama uphumele obala ngoFreese
UPHUMELE obala ngesinqumo sokulanda u-Allan Freese umqeqeshi weHighlands, u-Owen Da Gama, egijima kwiNational First Division (NFD).
UDa Gama uthathe izintambo kwiHighlands Park emasontweni edlule. Usefike kuleli qembu wenza umehluko.
Uphinde wenza nenqwaba yezinguquko eqenjini. Ulethe uFreese osanda kuxoshwa yiRoyal Eagles. UFreese sekuphele isikhathi agcina ukuba yibamba lomqeqeshi. Ubambe izintambo kwiPlatinum Stars, Highlands Park nakwiEagles.
“Sinobudlelwano obuhle kakhulu no-Allan. Ngisebenze naye iminyaka engu-10 kwiSilver Stars (Platinum Stars). Usengumqeqeshi osekhulile. Uzokwenza umehluko eqenjini. Ngiyazi ukuthi akazile lapha ukuzocathamela umsebenzi wami. Sobabili sinezinhloso ezifanayo. Sifuna ukusiza iqembu ekutheni libuyele lapho lifaneleke khona,” uDa Gama.
Ngempelasonto iHighlands ibhudluze iSuper Eagles ngo 3-0 eMakhulong Stadium.
“Akukuningi engifike ngakushintsha kodwa into engisebenze kuyona ukuzethemba kwabadlali. Izinga lokuzethemba beliphansi kodwa ngafika ngakushintsha konke lokho. Njengamanje sidlala ngokuzethemba. Ibanga okusamele silihambe ngiqonda kahle ukuthi lide kodwa ngeke siyeke ukusebenza kanzima. Ngeke sizikhohlise sithi sesingawina iligi. Iqembu esinalo lisadinga ukuqiniswa ukuze libe sezingeni lokuwina iligi,” kusho uDa Gama.
UDa Gama ufike leli qembu lidonsa kanzima.
“Ngiphumele obala mayelana nokuthi yiziphi izindawo engifuna ukuqinisa kuzona kodwa ngingakuqinisekisa ukuthi iqembu lethu sizoliqinisa. Okwenza ngingafuni ukuphumela obala ngezindawo esifuna ukuziqinisa wukuthi kunabadlali engisafuna ukubanika ithuba,” kusho uDa Gama.
NgoMgqibelo ngo-3.30 ntambama iHighlands izodudulana neBlack Leopards eThohoyandou Stadium.
Imiphumela yeNFD: Richards Bay 1-1 Uthongathi FC; Mbombela United 2-1 Royal Eagles; Tshakhuma Tsha Madzivhandila 1-0 Stellenbosch; Witbank Spurs1-0 Ubuntu Cape Town; Highlands Park 3-0 Super Eagles; Mthatha Bucks 2-1 Cape Town All Stars; Pretoria University FC 0-1 Black Leopards; Jomo Cosmos 2-1 Real Kings.