UBhele nejoka lokuvula igebe ngerekhodi
UZETHWESE ijoka lokuqinisekisa ukuthi uyalelula irekhodi lakhe lokuba umgadli obaqwaqwada bonke emakhanda ngokuqobela amagoli enethini emlandweni wePremier Soccer League (PSL), uSiyabonga “Bhele” Nomvethe waMaZulu.
UNomvete (39) usize Usuthu lumangaza iMamelodi Sundowns koweligi. Kulo mdlalo omunye umgadli woSuthu olunqobe ngo-21 uMabhuti Khenyeza uzisondeze kowakhe umlando ngokushaya igoli eliwawinisile. UNomvethe waKwaMashu uqale ebhentshini kulo mdlalo weSundowns, ebambene ngamagoli angu110 noDaniel “Mambush” Mudau owayedlala kwiSundowns. Ukushaya kwakhe igoli obekungelokulinganisa kumbeke phambili ngawu111 emlandweni wePSL.
UBhele usedlale iminyaka engu-20 esigabeni esikhulu njengoba eziveze kwabaningi ngeAfrican Wanderers ayedlala kuyona noSibusiso “Rhee” Zuma noPhumalni “BMX” Mkhize ukukha nje phezulu.
“Kuyangijabulisa ukuthi leli rekhodi ligcine liwele kithina. Angikaze ngicabange ukuthi into enje ingenzeka kimina. Ngijabulise kakhulu izolo (esho ngoMgqibelo) ngitshelwa ukuthi sengiphethe irekhodi lika-111 wamagoli,” kusho uNomvethe.
Uthe uzoqhubeka nokusebenza kanzima bese ehlalela ethembeni lokuthi umqeqeshi uCavin Johnson uzolokhu embiza nje uma emdinga.
“Ngiphoqelekile manje ukuthi ngikhuphule indlela engisebenza ngayo. Lokhu angikusho ngenxa yerekhodi kuphela kodwa ngikusho ngoba liphelezelwe ukusiza iqembu okuyiyona into engiyiqashelwe. Sesifikile manje isikhathi sokuthi Usuthu luphakame ngoba sekukhulunywe ngalo isikhathi eside.”
Ngemuva kokusuka kwiWanderers, uNomvethe ujoyine iKaizer Chiefs ayishayele amagoli angu-42 emidlalweni engu-79. Ushiyile waya kwiSerie A yase-Italy kwi-Udinese lapho ehlale khona iminyaka emine ngaphambi kokubuyela ekhaya azodlalela i-Orlando Pirates. Uhlale kancane kwiPirates wabuyela e-Europe lapho ephinde wabuya khona ngo-2009 wasayina kwiMoroka Swallows.
KwiSwallows ushaye amagoli angu-53 emidlalweni engu-149 okuholele ekutheni aqokwe kwiPSL njengomgadli obashaye bonke ngesizini ka-2010/2011. Kuleyo sizini ushaye 20 wamagoli ngaphansi kukaGordon Igesund. Ubuyele eKZN njengoba esezophula leli rekhodi. UKhenyeza usesendaweni yesithathu kulolu hla lapho ebambene khona noManuel “Tico Tico” Bucuane ngamagoli ePSL angu-104. Abanye abadlali asebefikile ekhulwini uSiphiwe Tshabalala noCollins Mbesuma abano-101.