Izingane zibukise ngabantu abadala
KUPHENDUKE amatafula emqhudelwaneni wesibhakela iFeatherweight Super Four, abafana abancane bengqimuza “amakhehla” e-Emperors Palace, eGauteng, ngoMgqibelo ebusuku.
ISuper Four iqhatha abashayisibhakela abane baseNingizimu Afrika esisindweni se-Featherweight ngohlelo lokuthi abawinile bangqimuzane kowamanqamu ngonyaka olandelayo. Izimpi kade zihlelwe yiGolden Gloves Promotions zibizwa ngeFour Go To War.
U-Azinga “Golden Boy” Fuzile (21) wase-Eastern Cape uhlule uTshifhiwa “Spider” Munyai ngomcacamezelo womlalisa phansi ngomzuliswano wesithathu. Kwenye impi uLerato Dlamini uhlule ngamaphuzu umakadebona uSimpiwe “V12” Vetyeka.
Iningi labalandeli besibhakela ebeliphume ngobuningi ukuzothakasela isibhakela, lisale libambe ongezansi. Bambalwa abebezitshela ukuthi abashayisibhakela abanezimpi ezingaphansi kuka-11 emunye (Fuzile noDlamini) bangahlula omakadebona abanomlando obambekayo esibhakeleni somhlaba. UVetyeka (29-4-0), owayengumpetha we-World Boxing Association (WBA) ne-International Boxing Organisation (IBO) featherweight, ushiye kukhalwa e-Indonesia ngo-2013 ehlula iqhawe labo uChris John, layeka isibhakela. Ngakolunye uhlangothi uMunyai (28-5-1) wayengumpetha we-IBO super featherweight.
Emuva kwempi, uFuzile (21) ozoqala ukubhala iphepha lika-matric namuhla, uthe okwenzekile kuwumphumela wokuyihlelela kahle impi noMunyai.
“UMunyai ubengeke adlule kalula kimina ngoba kade ngizitshelile ukuthi ngifuna ukuba wumpetha. Angijahanga, ngazikalela isivinini. Bengisebenza ngephutha alenzayo, izinto zenzeka kalula. Ngizobuyela esikoleni manje ngiyobhala umatric,” kusho uFuzile.
Ozowina phakathi kukaFuzile noDlamini, abazotholana phezulu kowamanqamu ngonyaka ozayo, uzokhala emuke no-R500 000 nethuba lokulwela ibhande le-World Boxing Council (WBC) phesheya kwezilwandle. UFuzile, ongakaze ehlulwe ezimpini eziyisishiyagalolunye, uqale isibhakela ngo-2014. Uwine ibhande le-SA featherweight ehlula uMacbute Sinyabi empini yakhe yesihlanu.
UFuzile uphethe nebhande le-interim WBC Youth World Featherweight neleIBF Continental Africa Featherweight. UDlamini, oqale isibhakela ngo2015, uphethe ibhande le-IBF Youth Featherweight.