Kudutshulwe umfundi wafa Ongoye

BAHLALELE ovalweni abafundi base-University of Zululand, Ongoye, emuva kokuthi kudutshulwe uzakwabo wafa ngoMsombuluko ebusuku, okuthiwa ubezobhala iphepha lokugcina ngoLwesibili.

UNksz Nqobile Ngema (25) okuthiwa ubenza izifundo zobuthisha, udutshulwe amahlandla ayisithupha ngaphandle kwesikhungo KwaDlangezwa. Abanye abafundi bakhale ngokungaphephi kuFacebook. Abanye bebefaka izithombe zomfundi odutshuliwe bebalisa nangokungaphephi kwabo.

Esitatimendeni esifakwe kuFacebook esibhalwe inhlangano yabafundi iNational Students’ Movement (Nasmo), kuvela ukuthi abafundi bakhathazekile futhi bayesaba. INasmo idlulise amazwi enduduzo emndenini nakwabanye abafundi abebemazi.

Okhulumela amaphoyisa KwaZulu-Natal, uLieutenantColonel Thulani Zwane, uthe umfundi udutshulwe ngezithuba zabo 7 ebusuku.

Isidumbu sakhe sitholwe lapho ebehlala khona eNkonjane Reserve.

“Amaphoyisa aseMthunzini aphenya icala lokubulala kodwa akekho oseboshiwe.”

Okhulumela isikhungo, uMnuz Gcina Nhleko, uthe kusekusha ukuthi banganika imininingwane ephelele ngomfundi ngoba kusaphenywa kodwa bathemba ukuthi kuzocaca maduze.

Seziziningi izigameko zokubulawa kwabafundi Ongoye. Ngonyaka odlule kwadutshulwa uMnuz Frank Chirwa owayenza iBachelor of Commerce. NgoJulayi nonyaka kwatholakala isidumbu sikaNksz Lelethu Ngobese (21) emjondolo emuva kokuba enyamalele.