Isililo kugwetshwa owanquma ikhanda lomnakwabo
UKHALA ngokungatholwa kwekhanda lelungu lawo umndeni wowesifazane waseMnywaneni, eDonnybrook, izolo okugwetshwe umnakwabo iminyaka engu-30 ozivumele icala lokumshumpula ikhanda ephila.
Izolo, umndeni kaNksz Nomthandazo “Maphili” (20) Dlamini uhluleke ukuzibamba wakhala ngesikhathi kugwetshwa umbulali uJwayelile “Mtsako” Khuboni (39)
Uyise kamufi uMnuz Ndoda Dlamini uthe okubenza bakhale wubuncane besigwebo nokuthi abangcwabile ngoba bafuna izicubu zendodakazi yakhe.
“Kubuhlungu futhi kunzima ukwamukela lesi sigwebo ngoba besifuna udilikajele, besifuna akhulume neqiniso, achaze ukuthi walibekaphi ikhanda nengalo yendodakazi yethu. Asingcwabile ngoba izicubu zakhe aziphelele. Ngeke sikwazi ukungcwaba engakapheleli. Sifuna izicubu zakhe, “kusho uDlamini.
Lo mndeni uthe isimo simuncu njengoba kuvela ukuthi umakhelwane uyathinteka ecaleni engakaboshwa futhi umbulali wathi nguye owazi lezo zicubu.
UNkk Phumzile Memela uthe kuyabadida impela bengumndeni ukuthi ugwetshwe kanjani umuntu ekubeni iqiniso engalikhulumanga lonke.
“Ngeke siphele isilonda sokubulawa singazi ukuthi ikhanda likuphi. Bekumele aveze konke uma elivuma ngempela icala. Sizoxola kanjani kunjena?” kubuza uNkk Memela.
Lo mndeni ubukhihla isililo kucace ukuthi kuvuka iminjunju.
UNksz Happy Dlamini ukhale ngamaphoyisa.
“Sicela amaphoyisa afune u... (esho umakhelwane) aze amthole ngoba kuyacaca ukuthi unolwazi ngezicubu. Umakhelwane, ongasekho endaweni njengamanje, ubalekile,” kusho uNksz Dlamini naye oyisihlobo.
Unina kamufi uNkk Buzani Dlamini uze wanikwa amanzi elokhu ekhala. Kuthiwa selokhu kwenzeka lesi sigameko ngoSepthemba 9 nonyaka, akakaze alale, ukhala ngendodakazi yakhe.
Umufi ubenengane yentombazane eneminyaka eyisithupha. Ubesebenza efemini esendaweni, ondla umndeni wakhe.
Umndeni uthe naleli soka abulawelwe lona abalazi.
Indodakazi kamufi kuthiwa isiyesaba ukuya esikoleni ngoba ezinye izingane ziyayihleka ngokuthi unina watholwa engenakhanda.