Luzomiswa uhlelo lokukhiqiza amandla ngenuzi: Gigaba
UNGQONGQOSHE weziMali, uMnuz Malusi Gigaba, uphinde waqinisekisa abantu bakuleli ukuthi luzomiswa okwamanje uhlelo lokukhiqiza amandla ngenuzi ngoba ayikho imali.
Ethula isabelo sezimali samaphakathi nonyaka eKapa izolo, uthe ngeke okwamanje izwe lisebenzise lolu hlelo ngoba imali ayikho.
Lokhu kulandela izinsolo zokuthi uMengameli Jacob Zuma uphusha ukuthi lolu hlelo lusetshenziswe ngemuva kokuvakashela eRussia.
“Okwamanje izwe ngeke likwazi ukukhokhela lolu hlelo, nesabelo sezimali asivumi. Akuyona into okuthiwa siyakhohlwa ngayo ngoba umnyango wezamandla usohlelweni lokubheka izinhlelo ezehlukene zokukhiqiza amandla,” kusho uGigaba.
UNgqongqoshe wezaMandla, uMnuz David Mahlobo, ekhuluma kwi-eNCA izolo ngemuva kwalesi sabelo, uthe bazoqhubeka nohlelo lokukhiqiza amandla ngenuzi.
Uthe lokhu kuzokwenzeka uma kungukuthi imali ikhona.
“Izinto ezithinta ukukhiqizwa kwamandla kuyasithinta sonke, sikhiqiza ngegesi nangamalahle ngakho neyenuzi ngeke siyishiye ngaphandle,” kusho uMahlobo.
UGigaba uphinde wagcizelela okwashiwo nguZuma ukuthi izwe lizoqhubeka nohlelo lokukhiqiza amandla ngenuzi kancane kancane kuye ngokuthi lizokwazi yini ukukhokhela lolu hlelo.
Kuthiwa izikhungo zokukhiqiza amandla ngenuzi zingabiza ngaphezulu kukaR1 trillion kodwa uMgcinimafa noMnyango wezaMandla awukaze ukuqinisekise ukuthi kuzoba yimalini ukwakha lezi zikhungo.
NowayenguNgqongqoshe wezimali, uMnuz Pravin Gordhan, wathi ngeke izwe likwazi ukukhokhela uhlelo lwenuzi.
Kuleli sonto ihhovisi likaMengameli liyichithile eyokuthi kunethimba elaya eRussia ukuyokhuluma ngendaba yenuzi.