Siyanyuka isikweletu sikahulumeni
SIYANYUKA isikweletu sikahulumeni njengoba ngo-2020 kulindeleke ukuthi sibe nguR3.4 trillion okusho ukuthi uhulumeni kumele aboleke imali ukuze axhase izinhlelo zakhe.
Ethula isabelo sakhe sokuqala samaphakathi nonyaka ePhalamende eKapa izolo, uNgqongqoshe wezeziMali, uMnuz Malusi Gigaba ubalule ukuthi ukunyuka kwezikweletu kuzokwenza ukuthi ibhekwe eyokunyuswa kwentela.
Sekubunjwe nethimba loNgqongqoshe elizoqhamuka nezixazululo endabeni ethinta izikweletu eminyakeni emithathu ezayo.
Leli thimba elifaka uGigaba, uNgqongqoshe wezobuChwepheshe uNkk Naledi Pandor noNgqongqoshe ehhovisi likamengameli uMnuz Jeff Radebe lizobe libika ngqo kumengameli ngezinhlelo zokwehlisa izikweletu zikahulumeni.
“Ezinye izinhlelo kuzodingeka ukuthi sehlise imali esizixhasa ngayo. Sifuna ukwehlisa isikweletu sikahulumeni,” kusho uGigaba.
Okhulumela iDA ophikweni lwezimali uMnuz David Maynier, uthe siyakhula isikweletu sikahulumeni sisuka ku-R67.9 billion sizofinyelela kuR2.3 trillion.
“Lokhu kusho ukuthi ngo-2020/2021 isikweletu sizonyuka sifinyelele kuR3.4 trillion noma u-60% weGrowth Domestic Product. Kuyashaqisa ukuthi imali eyinzuzo ishoda ngoR50.8 billion,” kusho uMaynier.
UGigaba uthe lo R50.8 billion wenzuzo eshodayo kulindeleke ukuthi eminyakeni ezayo, ngo-2020 inyuke ibe nguR89.4 billion.
Uthe eminyakeni ezayo umnotho kulindeleke ukuthi ukhule ngo-1.2% wathi ngo-2020 uzokhula kancane ngo-1.9%.
UGigaba uthe kudingeka kukhuliswe umnotho wathi akungabazeki ukuthi likhona ithemba lokuthi umnotho ungakhula.
Uthe izinga lokungasebenzi liphezulu njengoba lingu-27.7% wathi abantu abakhahlamezeka kakhulu yintsha.
Uthe omasipala kulindeleke ukuthi basebenzise uR197 billion wanxusa ukuthi abenza imisebenzi nohulumeni bakhokhelwe zingakapheli izinsuku ezingu-30.
“Sibambe umkhonyovu kuhulumeni nasezinkampanini zawo ngokubuyekezwa kwezinkontileka ezingaphezulu kukaR10 million.
“Izikhulu zikahulumeni ezihluleka ukukhokhela izinkampani ezenza umsebenzi kumele zithathelwe izinyathelo,” kusho uGigaba.
Ubalule nokuthi sebonge uR2 billion ezintweni ezithinta ukubanjwa kwemihlangano, ukukhangisa, ukudla nezinto ezithinta ukulaliswa kwabasebenzi bakahulumeni.