Kuzolethwa ushintsho ezinkampanini zikahulumeni
UNGQONGQOSHE wezeziMali, uMnuz Malusi Gigaba usethe uhulumeni uzimisele ngokuletha ushintsho ezinkampanini zikahulumeni esezidume ngokuphatha budlabha nokufuna ukutakulwa ngaso sonke isikhathi.
Ekhuluma ngesikhathi ethula isabelo mali saphakathi nonyaka izolo uGigaba uthe izinkampani zikahulumeni okubalwa kuzona u-Eskom, Transnet noSouth African Airways (SAA) yizinkampani ezenza imali enkulu asebeqalile ukuzisebenzisa ngobuchule.
Uthe banethemba lokuthi bazothola uR3.9 billion ngokudayisa amasheya akwaTelkom bathole imali edingekayo yokutakula iSAA. Kulo nyaka iSAA kulindeleke ukuthi ithole uR4.8 billion.
Uthe sebeqalile ukuletha ushintsho kwezinye zalezi zinkampani wenza isibonelo ngeyakwaTransnet athe sebeqinisekise ukuthi baqasha izinkampani zabamnyama ukuze zibheke amabhuku ale nkampani.
Uthe lokhu kusiza ngokuthi lezi zinkampani zikwazi ukuthuthuka kwezezimali nokuthi zingakhishwa inyumbazana yizinkampani ezinkulu ngoba zithi azikabi nesipiliyoni sokusebenza ezimeni ezibucayi zisiza izinkampani ezinkulu.
“Izingqinamba ezikhona kwezinye izinkampani zize zimboze okuhle okwenzeka kwezinye njengeDBSA okuyisikhungo esenza kahle. Enye inkampani, i-Airports Company of South Africa Limited (ACSA), isihlinzeke izinhlelo ezisezingeni lamazwe omhlaba,” kusho uGigaba.
Uthe nebhange lomhlaba, iLand Bank, lenza kahle ekwesekeni abalimi abasafufusa.
Uthe uhulumeni ungaziphatha ngendlela efanele izinkampani ezingaphansi kwawo futhi uzoqinisa isandla ukubuyisela ezingenzi kahle esimeni esifanele. Ukhwele wadilika ezikhulwini athe zihola imali ejwayele ukukhokhelwa izikhulu zakwezinye izinkampani ezizimele. “Kufanele iqedwe le nto yokufuna ukutakulwa ngaso sonke isikhathi nokumosha okwenziwa yizinkampani zikahulumeni,” kusho uGigaba.