Sigxekwe abaningi isabelo-mali
KUHLUKENE imibono emaqenjini ezombusazwe ngesabelo-mali sesigamu sonyaka esethulwe nguNgqongqoshe weziMali kuleli, uMnuz Malusi Gigaba izolo.
Umholi we-UDM uGeneral Bantu Holomisa umgxekile uGigaba wathi isabelo-mali sakhe asibambeki. Umholi weCope uMnuz Mosiuoa Lekota naye usigxekile wathi uyilahle ngohlelo lwenuzi kagesi esisuse umsindo.
Umholi we-IFP inkosi Mangosuthu Buthelezi uthe ubengenalo ithemba lokuthi ikhona into esile ezophuma kulesi sabelo-mali.
UButhelezi umncomile uGigaba wathi ukhombise ukwethembeka ngokubeka isimo somnotho wezwe njengoba sinjalo.
Inkulumo kaGigaba iqale ngokuphazamiseka. Amalungu e-EFF abengafuni akhulume ethi ukhohlakele futhi uyincelebane yakwaGupta.
Umsindo ususwe nguDkt Mbuyiseni Ndlozi othe ngeke umfana wakwaGupta (Gigaba) athule isabelo-mali ePhalamende.
Uthe uGigaba ugcwele inkohlakalo, wathi uma bemvumela kuzokube bagcoba inkohlakalo yakhe.
Okhulumela i-ANC kuzwelonke uMnuz Zizi Kodwa uncomile wathi sigxile kubantu.
“I-ANC ineme ngendlela uGigaba acubungula ngayo izinkinga eziphazamisa ukuyiswa kwezidingo kubantu,” kusho uKodwa.
Uthe bayakwamukela ukungenelela kukahulumeni ekukhulisweni komnotho wamalokishi, izindaba zasemakhaya, ukuqiniswa kwamabhizinisi kahulumeni nokwengezwa kwemali esiza abafundi emanyuvesi.
INhloko yezokuXhumana kwiNFP uMnuz Sabelo Sigudu ithe okushiwo wuGigaba yizithembiso ezingeke zifezwe.
“UGigaba uphinda iphutha likaMengameli Jacob Zuma lokukhuphula amathemba angekho,” kusho uSigudu.
Okhulumela iPAC kuzwelonke uMnuz Kenneth Mokgatlhe uthe baphoxekile ngesabelo-mali ngoba asikhulumanga ngezinto ezithinta abantu.
Uthe abazange batshelwe ukuthi iSAA izotakulwa kanjani ezinkingeni enazo.